Kommune Qeqertalik Naalakkersuisullu inuussutissarsiutit suleqatiigissutigilerpaat


Aasianni inuussutissarsiutit takornariaqarnerlu pillugit ulluni kingullerni marlunni isumasioqatigiittoqarpoq.

Inuussutissarsiornermut nukissiuuteqarnermullu naalakkersuisoq Aqqalu Jerimiassen aamma Kommuneq Qeqertalimmi borgmesteri Ane Hansen kommunimi inuussutissarsiortut peqatigalugit ullut kingullit inuussutissarsiornermut takornariaqartitsinermullu ineriartortitsinissamut isummanik piviusumik suleqatigiissutigisinnaasanik pilersaarusioqatigiipput.

Inuussutissarsiornermut tunngasut oqaloqatigiissutigineri aamma najukkami inuussutissarsiortut misilittagaat tigussaasut inuussutissarsiornerup inerisarnissaanut atugassatigut pitsaasumik sinaakkutissiisinnaapput. Kommunimi inuussutissarsiornermut periarfissat oqaloqatigineri siunissami periarfissanik tunniussipput.

Nuna tamakkerlugu aamma nunap immikkoortua eqqarsaatigalugu inuussutissarsiornermut takornariaqarnermullu inerisaanissamik pilersaarutit periusissiat ataqatigiissaarnerini qanimut suleqatigiinnissaq aallartinniarlugu Naalakkersuisoq Aqqalu Jerimiassen aamma Borgmester Ane Hansen isumasioqatigiinnerup saniatigut aalajangerput. Isumaqatigiinnermut tassunga atatillugu kommunimi inuussutissarsiornermut inerisaanissamut siunnersuisooqatigiit pingaarnertut pilersinneqassapput.

Borgmester Ane Hansen tassunga atatillugu ima oqarpoq:
 ” Takornariaqarneq inuussutissarsiutillu eqqarsaatigalugit nuna tamakkerlugu najukkamilu suliat pitsassaasumik ataqatigiissinnissaat pingaaruteqarpoq, taamaalilluta tamatta assigiimmik tunuaartaqalissaagut”.

Naalakkersuisup Aqqalu Jerimiassenip nuna tamakkerlugu periusissuassami Kommune Qeqertalimmut tunngasut saqqummiussinnaagamigit iluarisimaarpai nangillunilu oqarpoq; ”Kommunimit inunnillu tassani najugaqartunit periusissiassamut eqqarsaatersuutit isummallu ilanngukkusutat assut uanga soqutigaakka”.

Kommuni takornarianut sullissivimmik (visitorcenterimik) pilersitsinissaq anguniarlugu aqutsisooqatigiinnik kommunit Namminersorlutillu Oqartussanit peqataaffigineqartumik pilersitsisoqassasoq Borgmester Ane Hansen aamma Naalakkersuisoq Aqqalu Jerimiassen periusissiamik suliaqarnerminnut ilaatillugu isumaqatigiipput.

Aappaattut suleqatigiissutigineqarsinnaasoq tassaavoq Kommune Qeqertalimmi imermik tunisassiorneq avammullu tuniniaasinnaanissamut periarfissat qulaajarneqarnissaat nittarsaannissaallu.

Kommunimi ataavartumik nukissiuutitigut pilersuinissaq pillugu aalajangiinissamut 2019-p ingerlarnerani toqqammaviusunnaasumik suliaqartoqassasoq illuatungeriit isumaqatigiissutigaat. Aammattaaq Kangaatsiami imermik pilersuinerup pitsanngorsaavigineqarnissaanut periarfissat misisorneqassasut illuangeriit isumaqatigiissutigaat.

Isumasioqatigiinneq aamma Kommune Qeqertalimmi immikkuullarissutinik qulaajaanermut aallarnissaaviuvoq. Taamaalilluni najukkami suliaqartut oqaloqatigalugit immikkuullarissutsit arlallit piukkunnarsarneqarsinnaasut toqqarneqassapput aamma kommunimi takornariaqarnerup siunissami ineriartortinneqarnissaanut sinaakuusiisusinnaanngussapput.


Paasissutissat amerlanerit uani pissarsiarisinnaavatit:
Kommunaldirektør Hans Peter Poulsen, tlf. 482473, e-mail hppo@qeqertalik.gl og Departementschef Jørn Skov Nielsen, Departementet for Erhverv og Energi, tlf. +299 55 61 88, e-mail: jsn@nanoq.gl