Perlerortoqarnera pillugu mianersoqqussut

Asseq: Martin Schiøtz

Kalaallit Nunaanni Uumasunut Nakorsaqarnermut Inuussutissalerinermullu Oqartussaqarfik (UNIO) kommuniniit innuttaasuniillu teriannissanik ileqqorinngisaminnik pissusilersortunik takusaqarsimasunit saaffigineqaqattaarpoq, taamaammallu perlerortoqarnera pasitsaanneqarluni. Uumasunut inunnullu allanut perlerornerup tunillaassuunnissaa aarlerinarmat saaffiginninnerit tamakku pimoorunneqarput.
Kalaallit Nunaanni teriannissat akornanni perlerornerit takornartaanngillat. Perlerorneq virusimit nappaataavoq sianiutinik qaratsamillu aseruisartoq, nappaallu inuit uumasullu toqussutigisinnaavaat. Perlerornerup virusia uumasut tunillatsissimasut nuaanni annertuunngorluni nassaassaasarpoq aamma kilernernut kimillannernullu kiisinikkut qisertinnikkulluunniit tunillaassuisarluni.

Perlerornermut ersiutit

Uumasut perlerortut allatut pissusilersulertarput. Teriannissat perlerortut napparsimanerup aallartinnerani nujuartuujunnaartarput, tamannalu pissutigalugu uumasunut inunnullu qaninnialertarlutik. Uumasut tunillatsissimasut amerlanertigut tunillatsinnerminniit ullut 3-14-it iluanni napparsimanerminnut ersiuteqalersarput, kisiannili sapaatip akunneri arfineq-pingasut angullugit ersiuteqarsinnaanatik.
Uumasoq perlerornermik tunillatsissimasutut isikkoqalersarpoq ukuninnga nappaammut ersiuteqaleraangat:
  • Ingasattumik nuffiorpat
  • Iisiniarnermik ajornartorsiorpat
  • Tassanngaannaq saassussiniarsarippat kamarujussuarpallu
  • Pissusissamisuunngitsumik eqqissiveeruteqqappat annilaangappallu
  • Ersinngitsumut kiisiniarsarisarpat
  • Pingaartumik alleqqumigut uppatimigullu nukillaartalersimappat
  • Paatsiveerusimaarpat
  • Attortinnissamut, qaammaqqutinut nipinullu annertuumik malussarissisimappat
Terianniaqartillugu upalungaarsimanissaq
Teriannissat qanillinngisaannassavatit. Pasitsannartumik pissusilersorpata imaluunniit najugaqarfinnut uumasunulluunniit allanut - soorlu qimminut - qaninniassappata piaarnerpaamik oqartussat attavigissavatit.
Teriannissat najugaqarfinnut qanillattornissaat eqqakkanik qimatsinaveersaarnikkut aamma nerisassanik eqqagassanillu qimatsinak nammineerlutit pinaveersaartissinnaavatit.
Teriannissamit kiitissagaluaruit piaarnerpaamik ikit imermik qaqorsaammillu salissavat, peqqinnissaqarfimmullu saaffiginnillutit.
Uumasuutigisat teriannissamit kiineqarpat piaarnerpaamik oqartussanut saaffiginnissaatit.

Akiuussutissiineq
Kalaallit Nunaanni uumasut allat inuillu illersorniarlugit qimminut qitsunnullu akiuussutissanik kapuuinissamut pilersaarutinik atuutsitsisoqalernikuuvoq.
Qimmerisat qitsuutigisallu perlerornermut akiuussutissanik kapitinnissaat inatsisitigut pisussaaffiuvoq. Qimmit qitsuillu tamarmik qaammatinik sisamanik utoqqaatigileraangata siullermeerlutik kapitissapput. Tamatuma kingorna ukiut pingasut qaangiunnerisigut akiuussutissanik kapiteqqissapput.
Uumasuutit akiuussutissamik kapitinniarpat najukkanni uumasunut nakorsaqarfik kommuniluunniit attaveqarfigissavatit.

Perlerorneq pillugu saaffiginninnerit
Uumasumik perlerortunik pasitsaassaqaruit tamanna UNIO-mut, politiinut kommunimulluunniit nalunaarutigissavat. Tamatuma kingorna Kalaallit Nunaanni Uumasunut Nakorsaqarnermut Inuussutissalerinermullu Oqartussaaffik qanoq pisoqaqqinnissaanik isummissaaq.
Uumasunik perlerornermik tunillatsissimasunik pasitsaassinernut tunngatillugu Uumasunut Nakorsaqarnermut Inuussutissalerinermullu Oqartussanut saaffiginnissutit uumasut@nanoq.gl-imut imaluunniit oqarasuaammut 34 50 00-imut oqarasuaatip ataasinngornermi, marlunngornerimi, sisamanngornermi tallimanngornermillu ammasarfiini nalunaaqutaq 9.00-imiit 15.00-imut pisinnaapput.