Nunani Avannarlerni Aalisarnermut Ministeriisa 23-ssaannik Savalimmiuni isumasioqatigiinneq

Aalisarnermut, Piniarnermut Nunalerinermullu Naalakkersuisoq Erik Jensen Nunani Avannarlerni Aalisarnermut Ministerit 23-ssaannik isumasioqatigiinneranni peqataavoq Savalimmiuni aalisanermut ministeri Høgni Hoydal qaaqqusisuulluni ataatsimiinnerlu Tórshavnimi pivoq ulluni aggustip 26-ianit 28-ianut 2018.



Kalaallit Nunaannit, Islandimit, Savalimmiunit, Ruslandimit aalisarnermut ministerinit kiisalu EU-mi aalisarneq pillugu kommissærimit isumasioqatigiinneq peqataaffigineqarpoq. Canada aamma Norge atorfilittamik qaffasissumik inissisimaffilimmik sinniisuuffigineqarpoq.



Ukioq manna isumasioqatigiinnermi pingaarnertut qulequtarineqarpoq imaani isumalluutinik nungusaataanngitsumik aqutsineq. Ministerit qaaqquneqarsimapput aalisarnermi aalisakkat pisarinerannit nalitusaanikkut atuisunut suliarineqartarneranni misilittakkanik oqalliseqqullugit kiisalu aalisakkanik nungusaataanngitsumik atuineq avatangiisinut mianerinninnermut naapertuuttoq kiisalu FN-ip ineriartortitsinermut nungusaataanngitsumik anguniagassanut 14-inut naapertuuttumik periaatsit iluanni aamma tunngasut eqqarsaatigalugit. Anguniakkat 14-ini pineqarput immanik kiisalu nunarsuatsinni imarpissuit attatiinnarnissaa anguniarlugu imaani isumalluutinik nungusaataanngitsumik atuinerup siuarsarnissaat.



Nunarsuatsinni pissutsit kiisalu maanna kinguaajusunut siunissamilu kinguaassanut imaanik aqutsinermik nungusaataanngitsumik siuarsaanerup pingaassusaa ministerit oqaluuseraat.



Ministerit erseqqissarpaat anguniagaq pingaarneq tassaasoq imarpiit nungusaataasumik atorneqarnissaannut illersornissaat kiisalu immat piujuartinnissaat imaani isumalluutinik pilersuisuunerisa pingaarnerpaajunerat aamma nerisassaqarniarnermut inuussutinullu pilersuinermut pingaarnerpaajunerat eqqarsaatigalugu.



Ministerit nunarsuatsinni plastikkinik eqqakkat imaanilu mingutsitsinerit eqqartorpaat. Imaani ilisimatusarneq paasissutissanillu katersineq pillugu nunat tamalaat akornanni ataqatigiissarnissaasa patajaallisarnissaat pillugu pisariaqartitsineq erseqqissarneqarpoq ministerillu oqaluuseraat imaanit uumassusilinnik aningaasarsiornerup ineriartortinnissaanut piumasaqaatinik inerisaanissaq aamma oqaluuseralugu.



Isumasioqatigiinnerup qulequtaanut atatillugu, tassa imaanik nungusaataanngitsumik aqutsineq, ministerit nassuerutigaat aqutsinermut atatillugu unammilligassat suliarinissaasa pingaassusaat, matumani avaleraasartuut, ammassassuit kiisalu saarullernat Atlantikup avannaata kangiani sineriallit akornanni agguarneqartarnerat.



Naalakkersuisup Erik Jensenip Kalaallit Nunaanni aalisarnermik aqutsineq atuuttoq pillugu ministereqatini ilisimatippai kiisalu erseqqissarlugu imaani isumalluutit Kalaallit Nunaanni aningaasaqarnermut qitiulluinnartuunera.



Naalakkersuisup erseqqissarpaa Kalaallit Nunaanni imaanit aningaasarsiornerup ineriartortinnissaa pingaartumik nutaaliornermiittoq kiisalu imaani uumassusilinnik, pingaartumik aalisakkanik, nalitusaanermiittut, aammali imaani isumalluutinik allanik ullumikkut atorneqanngitsunik atuinermiittoq.

Naalakkersuisup erseqqissarpaa pigisatsinnik annerusumik pissarsisarnissarput pingaartuusoq kiisalu nalitusaanermi nutaaliorneq, ineriartortitsineq nutarsaanerlu suliffeqarfinni ataasiakkaani pikkorissunik, siumut isigisunik pitsaasunillu ingerlatsinermiittoq aqutsisuniittorlu.



Naalakkersuisup oqaatigaa aalisakkerinermik nukittuumik imaanilu teknologiimik ilisimatusarnermik, ineriartortitsinermik nutaaliornermillu aningaasaqarneq nunap immikkoortuani nunalu tamakkerlugu aningaasaqarnermut iluaqutaasinnaasut taamaaliornikkullu inuusuttunut imaani isumalluutinik sulinissamut inuussutissarsiornissamullu kajumilersitsisinnaalluni.



Naalakkersuisup erseqqissarpaa imaanik illersuiniarnermi anguniakkanut tunngatillugu pingaartitaa tassaasoq imaani isumalluutinik illersuinissap atuinissallu imminnut oqimaaqatigiinnerisa qularnaarnissaa.



Naalakkersuisoq Erik Jensen ima oqaaseqarpoq:

Uagut Kalaallit Nunaanni aalisagartassanik aalajangiigaangatta, tamanna nunat allat nammineq imartaminni pisasseeriaasiat naapertorlugu pisartoq misigivara. Aalajangiisarnerit annertuneru¬su-tigut ilisimatusarnerit najoqqutaralugit pisarput. Uannut pingaaruteqarpoq erseqqissassallugu, Naalakkersuisut mianersortumik tunngaveqarneq pingaartimmassuk, tassani aqutsinissamik pilersaarutit aalajangiisarnermi toqqammavigineqartarnissaat pingaartinneqarlutik.



Isumasioqatigiinnermit nalunaarut uani takuuk



Naalakkersuisup Erik Jensenip Tórshavnimi isumasioqatigiinnermi Nunani Avannarlerni aalisarnermut ministerii kiisalu EU-p aalisarnermut kommissæria aalisarneq pillugu suleqatigiinnernut kiisalu nunat pineqartut isumaqatigiissutaannut tunngatillugu ataatsimeeqateqarpoq.



Naalakkersuisoq Erik Jensen Savalimmiuni tikeraarnermut atatillugu suliffeqarfinnut pulaarpoq Savalimmiunilu Nunanut allanut inuussutissarsiornermullu tunngasunik ministeri Poul Michelsen aamma Aalisarnermut ministeri Høgni Hoydal aamma ataatsimeeqatigisimallugit.



Allanik paasissutissanik pisariaqartitsisoqarpat Naalakkersuisoqarfimmi Pisortaq Jørgen Isak Olsen, oqarasuaat: 48 31 35