Inuussutissarsiorneq takornariartitsinerlu pillugit ataatsimiititsisaqattaarnerit avannamut ingerlaqqipput


Naalakkersuisup Aqqalu Jerimiasseni nunatsinni kommunini angalaarpoq. Inuussutissarsiorneq takornariartitsinerlu pillugit ataatsimiititsisaqattaarnerni Kommune Qeqertalik tullinnguunneqassaaq, ullunilu 29.-30. august Aasianni ataatsimiititsisoqassalluni.

Tasiilami isumasioqatigiinneq taama ittoq ingerlanneqaqqammerpoq, tassanilu inuussutissarsiornikkut takornariartitsinikkullu ineriartortitsinermi kommunit nukittorsarneqarnissaat pillugu suleriaqqinnissamut peqataasut assigiinngitsunik saqqummiussuipput.

Aasianni isumasioqatigiinnermi Naalakkersuisoq Aqqalu Jerimiassen – borgmester Ane Hansenimik suleqateqarluni – ulluni marlunni inuussutissarsiorneq takornariartitsinerlu pillugit isumasioqatigiisitsissaaq. Isumasioqatigiinnermi suliniutissat periarfissallu tamaanimiunit takornariartitsinermik inuussutissarsiornermillu ingerlataqartunit oqaloqatigiissutigineqassapput, taakkulu oqallinnerminni Visit Greenlandimik, Greenland Businessimik aammalu namminersorlutik oqartussaneersunik Kommune Qeqertalimminneersunillu qanimut eqqartueqateqassallutik.

Isumasioqatigiinnermi ilaatigut eqqartorneqassapput Kommune Qeqertalimmi takornariartitsinermi periusissiamut ilanngussassat, kiisalu nuna tamakkerlugu takornariartitsinikkut periusissiassamut 2019-imi piareerneqartussatut naatsorsuutigineqartumut ilanngussassat.

Naalakkersuisoq Aqqalu Jerimiassen naalakkersuisunngunngikkallarami Ilulissani takornariartitsinermik suliaqarpoq, isumasioqatigiinnerlu sioqqullugu ima nassuiaateqarpoq:

”Nuna tamakkerlugu periusissiaq najukkami pissutsinik aallaaveqassaaq taamalu nunap immikkoortuini ataasiakkaani periarfissanik aporfinnillu ersersitsisuussalluni.”


Isumasioqatigiinnermissaaq nuna tamakkerlugu takornariagassaqqissut pillugit isummersoqatigiittoqassaaq. Tassani siunertaq tassaavoq nunap immikkoortuani takornariagassaqqissut nittarsaanneqarnissaat pigineqarnissaallu qularnaassallugu, tamannalu ilaatigut pissaaq takornariagassat tamakku pillugit tigussaasunik ullutsinnullu naleqquttunik atortulersuinikkut. Alloriarneq siulleq tassaassaaq nunap immikkoortuani takornariagassaqqissunik nalunaarsuineq, tamatumanilu kommune tamaanilu najugallit qitiusumk inissisimapput.

Takornariartitsineq Inuussutissarsiornerlu pillugit Isumasioqatigiinnermissaaq Kommune Qeqertalimmi inuusssutissarsiornikkut periarfissat immikkut sammineqassapput kommunilu nutaaq inuussutissarsiornermik ingerlalluartumik qanoq pilersitsisinnaanersoq eqqartorneqassalluni.

Sapaatit akunnerini aggersuni kommunit sinnerini assingusunik isumasioqatigiisitsisoqartassaaq.

Paasisaqarnerujumalluni attavissaq:
Naalakkersuisoqarfimmi pisortaq Jørn Skov Nielsen, Inuussutissarsiornermut Nukissiuteqarnermullu Naalakkersuisoqarfik, tlf. +299 55 61 88, e-mail: jsn@nanoq.gl