Kalaallit Nunaata Reykjavikimi sinniisoqarfiani pisortassamik toqqaaneq

Nunanut allanut tunngasunut Naalakkersuisup aalajangerpaa Nunanut allanut Naalakkersuisoqarfimmi immikkoortortami pisortaq Jacob Isbosethsen Namminersornerullutik Oqartussat Reykjavikimi Sinniisoqarfianni pisortatut aallartinneqassasoq.

 

Vivian Motzfeldtip oqaatigaa:

 

Assut nuannaarutigaara 2018-mi aningaasanut inatsimmi Reykjavikimi Sinniisoqarfissamut aningaasaliisoqarmat. Sinniisoqarfimmi pisortap suliassaraa suliffimmik nutaamik ineriartortitsinissaq Kalaallit Nunaata Islandillu akornanni niuernikkut aningaasaqarnikkullu attuumassutilinnik patajaallisaanissaq kiisalu aalisarnikkut, peqqinnissakkut, takornariaqarnikkut, niueqatigiinnikkut, silaannakkut assatuinikkut inuussutissalerinikkullu suleqatigiinnernik patajaallisaanissaq. Sinniisoqarfiup Namminersorlutik Oqartussani naalakkersuisoqarfiit tamaasa sullittassavai.

 

Taamaattumik sinniisoqarfimmi pisortap nunanut allanut naalakkersuinikkut sukumiisumik tamatigoortumillu misilittagaqarnissaa pisariaqarpoq kiisalu islandimiut nunanut allanut nunallu aallartitaasa attaveqarfiginerinik ilisimasaqassalluni.

 

Piumasaqaatinut tamakkununnga Jacob Isbosethsen tamakkiisumik naammassinnippoq. Aarhus Universitetimi  cand.jur.-imi kandidatitut ilinniarsimavoq, 2007-imiilu Namminersorlutik Oqartussani atorfeqarnikuulluni. 2008-mit 2011-mut Aalisarnermut, Piniarnermut Nunalerinermullu Naalakkersuisoqarfimmi atorfeqarpoq, taassuma kingorna 2011-mit 2013-mut Kalaallit Nunaata Bruxellesimi sinniisoqarfimmi allatsitut sulisimavoq. 2013-mit Nuummi Nunanut allanut pisortaqarfimmi atorfeqarpoq: 2013-mut 2015-mut imminnut siunnersortitut, 2015-mit 2018-mut immikkoortumi pisortatut.

 

Pineqartoq taamaattumik pitsaanerpaanik tunngavissaqarpoq Reykjavikimi Kalaallit Nunaata Sinniisoqarfiani siullersaalluni pisortaanissaminut.”

Pasissutissat: Pisortaq Kenneth Høegh, oqarasuaat  (+299) 345148 mobil (+299) 565604.

Jacob Isbosethsen Namminersornerullutik Oqartussat Reykjavikimi Sinniisoqarfianni pisortaasussanngorpoq.