Inunnut innarluutilinnut atugassarititaasut ukkatarineqarput

Anthon Frederiksen Sisimiunut tikerarpoq


Anthon Frederiksen, Isumaginninnermut, Inatsisinillu Atuutsitsinermut Naalakkersuisoq ulluni makkunani Sisimiunut tikeraarpoq. Ippassaq augustip 23-anni Anthon Frederiksenip Inuit innarluutillit Illersuisuat Tilioq aamma nuna tamakkerlugu inunnut innarluutilinnut sullissivik Pissassarfik pulaarpai. Pulaagai tamarmik ukioq manna pisortatigut ammarneqarput.

”Pulaarnissannut qangali qilanaalersimavunga - nuannaaqaangalu Sisimiunut tikeraarnissannut sullissivinnullu marlunnut nutaanut pulaarnissannut kiisami periarfissaqalerama. Tiliumi Pissassarfimmilu sulisut assut oqaloqatigilluarpakka. Pulaarfikka tamarmik inunnut innarluutilinnut suliassaqarfimmi pissutsit pitsaassutsillu pillugit pitsanngorsaarusunnermik annertuumik kissaateqarput piumassuseqarlutillu. Inuit innarluutillit pisinnaatitaaffii pillugit sullissiviup aamma nuna tamakkerlugu innarluutilinnut sullissiviup pilersinneqarneri inuit innarluutillit atugaannut pitsanngorsaanissamut suliaqarnissamut pingaaruteqarluinnarput. Suliaannut malinnaanissamut qilanaaqaanga.” Anthon Frederiksen oqarpoq.

Nordisk Velfærdscenter ullumikkut tallimanngornermi augustip 24-anni Sisimiumi inuit innarluutillit pillugit isumasioqatigiissitsissaaq. Innuttaasut innarluutillit - sumiluunniit najugaqaraluarunik - pitsaanerpaamik sullinneqarnissaat ikiorserneqarnissaallu pillugit nunani ajornartorsiutigineqartut isumasioqatigiinnermi semmineqassapput. Isumasioqatigiinnermi peqataasuni ilaassapput ngo-t, kommunit sinniisui Ilisimatuullu nunatsinneersut, Sverigemeersut Finlandimeersullu. Ullumi Anthon Frederiksenip ISIp siulittaasua Akaaraq Samuel Olsen peqatigalugu isumasioqatigiinneq ammarlussavarput. Anthon Frederiksen isumasioqatigiinnissaq pillugu ima oqarpoq:

”Isumasioqatigiinneq manna ilutigalugu Nordisk Velfærdscenterip ilisimatuut nunanit avannarlerneersut ataatsimorfigissuarput inuillu innarluutillit pillugit unammilligassagut pillugit eqqartiussallutaloso. Nunatsinni inuit innarluutillit atugaat pillugit pitsanngorsaanissamut angusassamik toraagaqarluta suliaqareeraluarluta suli anguniagarput ungasippoq. Taamaammat nunanit avannarlernit misilittakkat aaqqiissutissallu isumassarsiorfigiuarnissaat pingaaruteqarpoq.”


Paasisaqarnerorusukkuit Naalakkersuisup allattaa Judith K. Nielsen attavigiuk, mobil +299 530627. mail: judi@nanoq.gl