Naalakkersuisut 2019-imut aningaasanut inatsisissatut siunnersuutaat pillugu tusagassiorfiit saqqummiussaannut erseqqissaaneq

All.: Pele Broberg Aningaasaqarnermut Naalakkersuisoq

Aningaasanut inatsisissatut siunnersuutip tallimanngornermi ulloq 24. august, nal. 12, tunniussivissaq nallertinnagu Inatsisartunut tunniutinnginnerani aningaasanut inatsisissatut siunnersuut iluarsiivigineqassasoq Naalakkersuisunit aalajangiunneqarpoq. Allannguinissaq tamanna pingaarnertut aaqqissuinermut tunngassuteqarpoq aammalu aningaasanut inatsimmi aningaasaliissutit imaluunniit angusassatut missingiutit allanngornerannik nassataqassanani.

 

Oqaasertaliussanut nutartikkanik ilanngussisoqarpoq, taamaalilluni aningaasanut inatsisissatut siunnersuummi konto pingaarnermut 10.13.11 (Aktiaateqarluni ingerlatseqatigiiffinnut toqqaannartumik aningaasartuutit) oqaasertaliussat Kalaallit Airports A/S-ip ataani mittarfiliortiternernut tunngasut 2018-mut Aningaasanut Inatsimmut ilanngunneqartut ingerlaqqissallutik.

Aningaasanut inatsisissatut siunnersuut naqitaq piaarnerpaamik malinnaatinneqassaaq.

 

Mittarfinnik sanaartornissamut inatsisissatut siunnersuummik (IIA2018/21) Inatsisartut suliarinninnerata siunertaanngitsumik tatineqarsinnaanera oqaasertaliussat siuliani allassimasut allanngortinnagit ingerlatiinnarneqarpata oqilisarneqarsinnaasoq Naalakkersuisut naliliipput. Sanaartorneq pillugu inatsisissamut nutaamut Naalakkersuisut siunnersuutaannik Inatsisartut suliaqarnerisa ingerlateqqinneqarnissaani naalakkersuinikkut akulerunnissaq Naalakkersuisut kissaatiginngilaat, malittarisassanik nutaanik taartaasussanik akuersissuteqartoqartinnagu oqaasertaliussat taaneqartut ilaatinneqanngippata tamanna peratarsinnaavoq.

 

2019-imut aningaasanut inatsisissatut siunnersuut iluarsisaq www.naalakkersuisut.gl-imi Aningaasaqarnermut Naalakkersuisoqarfiup nittartagaani sapinngisamik piaartumik tamanut saqqummiunneqassaaq. Aamma Inatsisartut nittartagaanni piaartumik tamanut saqqummiunneqarnissaa naatsorsuutigineqarpoq.”

 

Annertunerusumik paasisaqarusukkaanni saaffigineqassaaq Naalakkersuisoqarfimmi pisortaq Nikolai S. Christensen, mail: nsch@nanoq.gl.