Tunumi avaleraasartoorniarneq ingerlalluarpoq


Tunumi maannakkut avaleraasartoorniarneq ingerlalluartupilussuuvoq. Maannamut 50.558 tonsinik avaleraasartuunik pisaqartoqarpoq pisassiissutinit 66.365 tonsiusuneersunit. Tassa Tunumi 2017-imi avaleraasartoorniarnermut tamarmiusumut naleqqiullugu maanna amerlanernik avaleraasartuunik aalisartoqarsimalereerpoq. Siorna 46.727 tonsinik avaleraasartuunik pisaqartoqarpoq, 10.000 tonsit nunat tamalaat akornanni oqartussaaffiusumi imartami aalisarneqarlutik.

Akerlianilli ukioq manna Tunumi ammassassuarnik manna tikillugu aalisartoqanngilaq. 2017-imi Tunumi 10.298 tonsinik ammassassuarnik pisaqartoqarpoq.

Aalisarnermut, Piniarnermut Nunalerinermullu Naalakkersuisoq Erik Jensen ima oqaaseqarpoq:

- Tunumi avaleraasartuunik pisaqarluartoqarnera naammagisimaarparput, tamatumalu naalagaaffiit sineriallit ukiamut isumaqatiginninniarnissaannut Kalaallit Nunaata inissisimanera patajaallisissavaa. Avaleraasartoorniarnerup Kalaallit Nunaata imartaani suli nangeqqinnissaa kissaatigaarput.

Erik Jensen nangippoq:

- Aamma Tunumi ammassassuarnik aalisartoqarnissaa naalagaaffiit sineriallit isumaqatiginninniarnissaannut Kalaallit Nunaata inississimaneranut pingaaruteqartupilussuuvoq. Avaleraasartoorniarneq ingerlalluaqaaq, tamannalu pitsaasuuvoq, aamma naammagisimaarluinnarpara ingerlatseqatigiiffiit ammassassuarniarnissamut akuersissutillit amerlanerit ukioq manna ammassassuarniarnissamut pilersaaruteqarmata.

Paasisaqarnerorusukkuit attavigiuk Immikkoortortaqarfimmi pisortaq Kunuk Holm, oqarasuaat +299 345228, Email: kunh@nanoq.gl