”Oqaluttuanngisaannassaanga!”


Kalaaleq eqqumiitsuliortoq Gukki Nuka meeraalluni kinguaassiuutitigut atornerlunneqarsimavoq. Ulloq 22. august 2018 nal. 20.00-22.00 Katuap Inersuaaraani, Naalakkersuisut kinguaassiuutitigut atornerluineq akiorniarlugu periusissiaata “Killiliisa”-p 2018 - 2022, saqqummiunneqarneranut atatillugu oqalugiassaaq.
Inunnik Isumaginninnermut Inatsisinillu Atuutsitsinermut Naalakkersuisoq, Anthon Frederiksen, oqaaseqarpoq ”Oqalugiarneq Killiliisap aallartinneqarneranut ilaavoq, tassani paquminartut paquminarunnaarsinneqarnissaannut aallarniutaalluni. Assut nuannaarutigaara Gukki Nuka taamaaliornissamut peqataajumasimammat. Nutaamik periusissiornitsigut paqumigisaqarneq unitsinniarparput ilorraallu tungaanut allanngortitsilluta, taamaalilluta kikkut tamarmik peqataatinneqarlutik tusaaneqarlutillu misiginiassammata. Tamakku anguneqassappata pingaaruteqarluinnarpoq inuit sapiitsut Gukki Nukatut ittut saqqummerlutik uatsinnut oqaluttuarnissaat takutillutalu siunissap neriunartoqarneranik. ”

Oqalugiaat taaneqarpoq: ”Oqaluttuanngisaannassaanga!”, tassanilu Gukki Nukap oqaluttuani uagutsinnut oqaluttuarissavaa. Kinguaassiuutitigut atornerlunneqarnermi kingorna qanoq ililluni ingerlariaqqissimanini oqaluttuarissavaa. Ingerlariaqqinnerminut suut ikiuutaasimanersut oqaluttuarissallugit. Oqalugiaammi qanoq ililluni ingerlariaqqittoqarsinnaanersoq, qanoq imminut ikiortoqarsinnaanersoq aamma qanoq nalaassimasat pillugit oqaasinngortitsisoqarsinnaanersoq sammineqassapput.

Gukki Nuka oqalugiareerpat apeqquteqarfigineqarsinnaassaaq.

Saqqummiussineq toqqaannartumik streamerlugu linkikkut ugguuna malinnaavigineqarsinnaavoq: https://greenland.adobeconnect.gl/oqaluttuanngisaannassaanga/

Annertunerusunik paasisaqarusukkuit attaveqarfigissavat Naalakkersuisup allattaa Judith K Nielsen, mobil: +299 530627, e-mail: judi@nanoq.gl