Aningaasaqarneq pillugu nassuiaat 2018 saqqummerpoq

Ukiuni makkunani aningaasaqarnikkut maannakkut aallaavissat ataatsimut isigalugu pitsaasuusut Aningaasaqarneq pillugu Nassuiaat 2018-ip takutippaa. Aningaasat nalingata pitsaanerulernerat ilaatigut aaqqissuussaanikkut siunissamilu ungasinnerusumi iluanaarutaasinnaasunik angusaqarfiusumik inuiaqatigiit pitsaasumik ineriartortinneqarnissaannut tapeeqataasussanik isumatusaartumik aningaasaliinissamik periarfissanut ilaatigut atorneqassapput.

Inuiaqatigiittut unammillersinnaassuserput sapinngisamik annertunerpaamik attatiinnarniarlugulu pitsanngorsaqqinniarlugu aningaasartuutitta qaffasissusiata sapinngisamik annikinnerpaaffimmiitinnissaannut tamanna periarfissiissaaq.

Naalakkersuinikkut pingaarnertut anguniakkat anguniarlugit suliniuteqarnitsinni inuiaqatigiinni aaqqissuussaanerit ilaasa allanngortinneqarnissaat pisariaqartinneqartoq nassuiaammi takuneqarsinnaavoq.

Taamaalillunilu naalakkersuisooqatigiinnissamik isumaqatigiissut nutaaq aallaavigalugu aningaasaqarnikkut imminut napatinnerulernermik tunngavissaqalernissaq aammalu suliassaqarfinnik naalagaaffimmit tigusisinnaanermik piareersaasoqassasoq Naalakkersuisut kissaatigaat. Takorluukkat anguniakkallu tunngavigalugit isumatusaartumik atugassiinermik aallaavilimmik aningaasaqarnikkut politikimik oqimaaqatigiissaartumik ingerlatsinikkut tamanna ingerlanneqassaaq.

Ataatsimut isigalugu naalakkersuisooqatigiit kissaatigaat inuiaqatigiinni kikkut tamarmik suleqatigiinnerata nukittorsarneratigut inuiaqatigiit ineriartornerannik aammalu inuiaqatigiit nunarsuarmioqatigiinni inissisimanerannik nukittorsaanissaq. Tamanna ingerlanneqassaaq iluarsartuussinerit inuttussaasut inuuniarnermi atugaannik pitsanngorsaataasinnaasut pisariaqartut ingerlannerisigut aammalu suliffissanik nutaanik pilersitsinikkut amerlanerillu sulilersinnerisigut aningaasaqarnerup pitsanngoriartortinnerata ingerlatiinnarneqarnissaanik qulakkeerinikkut.

Aningaasaqarneq pillugu Nassuiaat 2018-imi tamatumunnga aallaaviusoq nassuiaatigineqarpoq. Ilaatigut maanna aningaasaqarnikkut inissisimaneq tamatuminngalu siumut naatsorsuineq tassani nassuiarneqarpoq, ilaatigulllu inuiaqatigiinni sumiiffimmi pingaarutilinni ineriartornerup killiffia takutinneqarluni.

Aammattaaq aningaasaqarnikkut ingerlatsinermi anguniakkanik tunngavissanillu Naalakkersuisunit akuerineqaqqammersut nassuiaammi allaaserineqarput, taakku ilaatigut naalakkersuisooqatigiinnissamik isumaqatigiissummi anguniakkat suliniutissallu piviusunngortinniarlugit sulinermut pisariaqartinneqassallutik.

Aningaasaqarneq pillugu Nassuiaat 2018

Annertunerusumik paasisaqarnerorusukkuit saaffissaq: Naalakkersuisup allattaa Qarsoq Høegh-Dam Toqq./direkte 34 52 12 qars@nanoq.gl