Pinerlunnermik eqqugaasut pitsaasumik siunnersorneqarnissaat qulakkeerneqassaaq

Naalakkersuisut pinerluffigineqarsimasunut tapersersuinertik siunnersuinertillu annertusarniarpaat. Suliniutit assigiinngitsut ingerlanneqarnerisigut pinnerluffigineqarsimasoq malinnaatinneqarnerusassaaq suliap ingerlanneqarnerani pitsaanerusumik tapersersorneqarnissamut siunnersorneqarnissamullu sullinneqarnermini.

Folketingep 10 mio. kr. ukiumut illikartissimavai piffissami 2018-2021-llu akor-nanni Kalaallit Nunanni inatsisinik atuutsitsinerup nukittorsarneqarnissaa pillugu.

Naalakkersuisut noqqaassutigisimavaat ilaatigut makku pillugit, pinerluffigineqarsimasut pitsaanerusumik ilisimatinneqartarnissaannut nukittorsaanissamut atugassatut. Politiit eqqartuussiviilluni suliaminnik suliaqarnerat inunnit amerlanerpaanit ilisimaneqarneq ajorput. Taamaattumik pingaaruteqarpoq, pinerluffigineqarsimasut suliap ingerlanneqarnerani ilisimatinneqartarnissaat. Ilanngullugu qulakkeerneqartariaqarpoq, politeeqarfinni eqqartuussivinnilu sulisut pitsaasumik pinerluffigineqarsimasumut oqaloqatiginnissinnaanissamut piginnaasaqarnissaat. Naak persuttaanerit, pinngitsaaliinerit meeqqanullu kinguaassiutitigut atornerluinerit pisortanit ajoraluartumik ilisimaneqareeraluartut, pinerluffigineqarsimasumut pisoq immikkuullarissuuvoq pisortanillu taamatut suliarineqar-tariaqarluni.

Inatsisinik atuutsitsinerup iluani Naalakkersuisut Iliuusissamik pilersaarumminni kissaatigivaat, pinerluffigineqarsimasut saaffiginniffissaasa nukittorsaavigineqarnissaat, imatut: inummut ulorianartorsiortitsisumik pinerluffigineqarnermi, pisup kinguninnguatigut sukkanerpaamik ikorfartuutaasumik tarnip pissusaannik ilisimasalimmik oqaloqateqartarnissaannik periarfissiinissamut, tamanna kissaatigineqarpat.

Naalakkersuisut massakkut ilanngullugu piareersarpaat persuttarneqarsimasumut telefonikkut siunnersuinermik pilersitsinissaq. Uani anguniarneqarpoq, pinerluffigineqarsimasut siunnersorneqarnissamik saaffiginnissinnaanissaat tarnip pissusaanik ilisimasalimmik oqaloqateqartarnissamut taarsiivigineqarnissamillu siunnersorneqarnissamut, inatsisitigut ikiorneqarnissamut, sillimmasiisarfinnullu nalunaaruteqarnissamut assigisaannullu ikiorneqarneqarnissamut.

”Pingaaruteqarpoq pinerluffigineqarsimasunut suliniuteqarnitta nukittorsarnissaat – katsorsarneqarnissamut ikorfartuinikkullu neqerooruteqartarnitsigut. Taamaattumik aamma immikkoortoq ilanngukkusussimavara ”Pinerluffigineqarsimasumut immikkut suliniutit” oqaluuserisassanut ilanngutissallugit septemberimi Justitsiministeri Søren Pape Poulsen ataatsimeeqatigilerukku”, taama Naalakkersuisoq Anthon Frederiksen oqaaseqarpoq nagillunilu:

”Pinerluffigineqarsimasunut pitsaanerusumik siunnersuineq ikorfartuinerlu Naalakkersuisut kinguassiutitigut atornerluinermut suliniuteqarnerminni atugassat pingaarutilerujussuartut ilaatippaat”.

Naalakkersuisut kinguaassiutitigut atornerluinermup suliuniutaat ”Killiliisa” ataasinngorpat 20. august saqqummiutissavaat.

Paasisaqarnerorusukkuit attavigiuk: Naalakkersuisup allattaa, Judith K. Nielsen, mobil +299 530627, mail: judi@nanoq.gl