Københavnimi kajumilluni pulaartarneq kissaatigineqarpoq


Peqqissutsimut Ilisimatusarnermullu Naalakkersuisoq, Doris J.Jensen kissaatigaa Københavnimi kalaallit napparsimasut kajumissutsiminik pulaarneqartarnerat pitsanngortinneqassasoq.

Peqqissutsimut Ilisimatusarnermullu Naalakkersuisoq Doris J. Jensen kalaallit napparsimasut Kalaallit Peqqissartut Illuaniittut pulaarpai ataatsimeeqatigalugillu. Ilutigalugu Doris J. Jensen Rigshospitalimi uninngasut arlallit pulaarpai Qitiusumillu aqutsisoqarfimmi siulittaasoq Sophie Hæstorph Andersen naapillugu.

Naapinnermi Doris J. Jensen Qitiusumi aqutsisoqarfimmi siulittaasoq Københavnimi kalaallit napparsimasut pitsaanerusumik pulaartalerneqarnissaanut pilersaaruteqarnermik ilisimatitsivoq.
Napparsimasut oqariartuutaat Danmarkimi suliaritinnerup nalaani kiserliorneq amerlanernillu sukisaarsarnissamik pisariaqartitsineq Naalakkersuisumit maluginiarneqarput.

Peqqinnissaqarfiup iluani pitsanngorsaaniarnerit saniatigut Naalakkersuisoq napparsimasunut kalaallisut oqaluttunik kajumissutsiminnik pulaartarsinnaasunik ujartuivoq.

Taamaattumik Doris J. Jensen pisortaq Leise Johnsen, tullersorti Niels Ole Jensen, Kalaallit Københavnimi eqqaanilu peqatigiiffiisa Kalaallit Illuutaanut aallartitaat Carsten Siegstad ataatsimiinnerup sioqqullugu ullumi naapippai.

Susassaqaqatigiit Kalaallit Københavnimi eqqaanilu peqatigiiffiisa Kalaallit Illuutaanut aallartitaat kalaallit innuttaaqataasut pillugit ukiamut ataatsimoorlutik ataatsimiinnissaminnut piareersarniarput.

- Neriuutigaara nammineq kajumissutsiminik aaqqissuussamut peqataanissamut soqutigineqarluarumaartoq. Nammineq kajumissuseq tunngavigalugu pisariaqartitsineq angivoq ajoraluartumillu tamanna siunissami minnerulernavianngilaq. Nuannaarutigaara Kalaallit Peqqissartut Illuat aammalu ataatsimoorluni peqatigiiffimmi aallartitaq suleqatigiinnissamut isumaqataammata, taama oqarpoq Doris J. Jensen.

Paasisaqarnerorusukkuit naalakkersuisup allattaa Rosa Thorsen rosat@nanoq.gl +299553303 attavigisinnaavat.