Naalakkersuisut kinguaassiuutitigut atornerluisarneq akiorniarlugu suliniutit pingaartillugit salliutippaat

All.: Anthon Frederiksen, Isumaginninnermut Inatsisinillu Atuutsitsinermut Naalakkersuisoq

Ullumikkut Sermitsiaq AGp nittartakkamini ilanngutassiaq saqqummiuppaat, tassani allallutik kinguaassiuutitigut atornerluisarnerup akiorniarneqarnera tulleriiaarinermi kingullinngortinneqarsimasoq.  Tassunga akinissara pisariaqartissimavara, tassami taamaattoqanngimmat.  Kinguaassiuutitigut atornerluinerup akiorniarneqarnera Naalakkersuisunit tulleriiaarinermi kingullinngortinneqanngilaq.  Kinguaassiuutitigut atornerluisarnerup akiorneqarnissaanut suliniutit pillugit suliassaqarfik Naalakkersuisunit pingaartinneqarluinnartoq, taamaattumik Naalakkersuisut kinguaassiuutitigut atornerluineq akiorniarlugu periusissiaat 2018-2022: “Killiliisa” 20. August 2018 tamanut saqqummiunneqassaaq.

Sermitsiaq AGp ilanngutassiaani atuarneqarsinnaavoq Inatsisinik atuutsitsinermut suliassaqarfimmi periusissatut suliniutissanullu Naalakkersuisut pilersaarutaanni pineqartoq tulleriiaarinermi kingullinngortinneqarsimasoq.  Tamanna eqqunngilaq.  Inatsisinik atuutsitsinermut suliassaqarfimmi periusissatut suliniutissanullu pilersaarummi suliniutigineqartussat tamarmik pingaartinneqarlutik salliutinneqarmata siullertut erseqqissassavara.

Ilanngutassiami suliniummi innersuussutigineqartumi taamaallaat meeqqanik kinguaassiuutitigut atornerluisoqarsimatillugu nalunaartoqarnerani politiit qanoq sukkatigisumik qisuariartassanersut pineqarmata aappaattut maluginiarneqassaaq.

Periusissiami atulertussami “Killiliisa”-mi suliniut taanna ilaatinneqareerpoq.

Tamatuma saniatigut Inatsisinik atuutsitsinermut oqartussat Kalaallit Nunaannilu Politiit ataavartumik suleqatigineqarput, aama Inatsisartuni ukiakkut ataatsimiinnissami qanittukkut pisussami kinguaassiuutitigut atornerluinernik pinerluuteqartarnerit pillugit pinerluttulerinermi inatsisip allanngortinneqarnissaanut aalajangiiffigisassatut siunnersuummik Naalakkersuisut saqqummiussissapput.  Innuttaasut ataasiakkaat kinguaassiutitigut atornerlunneqarnissamut illersugaanerisa annertusineqarnissaat aalajangiiffigisassatut siunnersuutip siunertarivaa.

Naggataagut erseqqissaatigineqassaaq suliniutissatut kissaatigisanik pingaarnersiuinermi allassimasut ataavartumik nutarterneqartarmata aamma kinguaassiuutitigut atornerluisarneq akiorniarlugu suliniutit ukkatarineqartuassammata.

Paasisaqarnerorusukkuit attavigiuk Naalakkersuisumut allatsi: Judith K. Nielsen, mobil +299 530627. Mail: judi@nanoq.gl