Piniarnermik nakkutilliisoq Erling Madsen nannunik pallittaaliuisarnerminut nersorneqarpoq

Erling Madsen Amerikamiut suliniaqatigiiffiannit Polar Bears Internationalimit World Ranger Day Award 2018-mik aggustip 6-anni nersornaaserneqarpoq, Ittoqqortoormiini qasusuilluni tunniussimallunilu sulinini pissutigalugu.

Erling Madsen Ittoqqortoormiuni 2014-imit piniarnermut nakkutilliisuulerpoq, Tunumi kisiartaalluni piniarnermik nakkutilliisuulluni. Ittoqqortoormiit nuna sanilerisaa tassaavoq nuna eqqissisimatitaq – nunarsuarmi nunani eqqissimatitani annersaasoq.
Erling Madsenip suliassaraa nannut illoqarfimmut qaninngoortut nakkutigissallugit. Nannut illoqarfimmut qanillivallaaraangata ungavartinniarlugit, soorlu aallaammik seqqorluni allanillu ersisaarutaasinnaasunik ersisaarlugit qimaatittarpai.

Piniarnermik nakkutilliisup suliaa pingaaruteqartorujussuanngorpoq, Ittoqqortoormiit kangerlussuat sikkorlukkaluttuinnarmat, nannut illoqarfimmut qanillisut amerliartuinnartut Ittoqqortoormiormiunut ukiuni kingullerni takussaanerulerlutik, ingammik illoqarfiup eqqaavianut nerisassarsiorlutik takkuttartut amerligaluttuinnarlutik.

Aasakkut sikut ukiuni kingullerni aamma akullaraluttuinnarmata nannut nunamiinnerulersarput, nunamiinnerulernerat innuttaasunut aarlerinarsigaluttuinnarluni.
Polar Bears International inunnut suleqatigiinnilluunniit ukiut tamaasa nersornaasiisarpoq, nersortagai tassaallutik inuit nannunik illersuiniarlutik ungavartitsiniartartut, inuit nannullu qanillattornaveersaarnissaannut salliuniarlutik suliaqartartut.
Nersornaasiunneqartartoq Erlingitut ittunut nersorinnissutaasarpoq, ungasissumi najugalinnut nannut inuillu toqqissisimasuunissaannik, unammillernarsinnaasumik, suliaqartunut.
Nersornaaserneqartoq allagartamik, kavaajamik Canada Goose-mik aamma aningaasanik tunineqartarpoq.

Polar Bears International siullermik 2016-imi nersornaasiivoq.
Aalisarnermut, Piniarnermut Nunalerinermullu Naalakkersuisoqarfiup Erling Madsen kusanarluinnartumik nersornaaserneqarnerani pilluaqquaa, nannunillu illoqarfimmut pallittaaliuilluni suliaqarnerujussuanut aamma nersorpaa innuttaasullu nannunut aarleqquteqaratik inuunissaannut qulakkeerinninneranut aamma nannut pallittaaliorlugit suliaanut nersorlugu.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Amalie Jessen. Email: amalie@nanoq.gl