Kinap Danmarkimi aallartitaa paasisassarsiorluni nunatsinniittoq

Kinamiut aallartitaata Deng Ying-ip nunatsinni tikeraarnerani nunani allamiut Københavnimi aallartitaannik nunatsinnut tikeraartoqartillugu nalinginnaasumik periaaserineqartartut malinneqarput, soorluttaaq aamma Kinamiut siusinnerusukkut aallartitarisartagaat allat tikeraarnerangata periaatsit tamakku malinneqartarsimasut. Imaappoq aallartitaqarnikkut sinniisup nunatsinni pissutsinik namminneerluni takusaqartinnissaa siunertaavoq.

Kinamiut aallartitaata nunatsinnut tikeraarneranut atatillugu aallartitaqarfik kinamiut filmiliaannik Katuaq Namminersorlutillu Oqartussat suleqatigalugit takutitsisaqattaarpoq.

Kinamiut filmiliaannik takutitsisaqattaarneq Nuummi ulluni aggustip 7-ani aamma 8-ni ingerlanneqarpoq, Sisimiuni 9. august ingerlanneqassaaq, taavalu aamma Ilulissani aggustip 11-ani ingerlanneqassalluni.

Aallartitap nunatsinniinnermini pinngortitamiinnermik misigitilaarniarlugu pilersaarutillu saniatigut allamut saatsilaarniarlugu Naalakkersuisut Siulittaasuata Nuup Kangerluani Qooqqunut angalaaqatigaa.

Taamaattumik angalaarnermi tassani ataatsimiittoqanngilaq; taamaattorli Kinamik niueqateqarnerup annerusarnissaa siunertaralugu 2017-imi ukiakkut Naalakkersuisut Kina-mut angalanerat sioqqullugu piareersartoqarnerani aallartitaqarfiup suleqataalluarsimanera pillugu Naalakkersuisut Siulittaasuat qujassuteqarpoq. Tamatuma saniatigut Naalakkersuisut Siulittaasuat mittarfiliariniarneqartut pillugit pilersaarutit killiffii pillugit Kinamiut aallartitaannit aperineqarami ilisimatitsissutigaa Naalakkersuisut siunnersuutaat piffissami matumani Inatsisartut Aningaasaqarnermut Akileraartarnermullu Ataatsimiititaliaannit suliarineqartoq.

Sukumiinerusumik paasisaqarusuttut Naalakkersuisup allattaa Eqaluk Høegh attavigisinnaavaat, oqarasuaatikkut 56 24 50-imut sianerlutik imaluunniit e-mailikkut: eqah@nanoq.gl allaffigalugu.