Tuttunniarnermi umimmanniarnermilu maleruagassat

Tuttunniarneq aamma umimmanniarneq ingerlasoq pillugu tuttunniarnermi umimmanniarnermilu malittarisassat atuuttut Aalisarnermut Piniarnermut Nunalerinermullu Naalakkersuisoqarfimmiit, APNN-imiit, matumuuna eqqaasitsissutigineqassapput erseqqissaatigineqassallutillu. Piniarneqarnerat 1. aggustimi 2018-imi aallartippoq piniarfinnillu amerlanerpaani sunngiffimmi piniartunut 30. septembari ilanngullugu ingerlassaaq inuussutissarsiutigalugulu piniartunut 15. oktobari ilanngullugu ingerlassalluni.

  • Akuersissutit taamaallaat inunnut 16-inik ukioqalereersimasunut tunniunneqarsinnaapput.
  • Akuersissutit inummut atiatigut taasamut taamaallaat atuupput allanullu tun-niunneqarsinnaanatik tunineqarsinnaanatilluunniit.
  • Tuttunik pisaqarnissamut qoorortuut minnerpaamik .222-mik sulloqqortussusillit atoqqusaapput qoorortuullu eqiinnartakkat eqittaannartakkallu atoqqusaanatik.
  • Umimmannik pisaqarnissamut qoorortuut minnerpaamik 6,5 x 55-mik sulloqqortussusillit atoqqusaapput qoorortuullu eqiinnartakkat eqittaannartakkallu atoqqusaanatik.
  • Aallaasit tuttunik aamma umimmannik pisaqarnissamut atoqqusaasut nakersarneqarsimassapput pitsaasuussallutillu.
  • Tuttunniarnermi umimmanniarnermilu pisarineqartut neqaat tamaat pisaqarfimmiit nassarneqassaaq.
  • Assartuutit tuttunik umimmannillu piniarnermut, malersuinermut ungoorinermulluunniit atoqqusaanngillat, erseqqissaatigineqarluni umiatsianiit, biiliniit, timmisartuniit aamma qulimiguulinniit seqqortoqaqqusaanngitsoq.
  • Qimmit tuttunniarnermi umimmanniarnermilu nassatareqqusaanngillat.
  • Akuersissutit pisanik nalunaaruteqarnertalerlugit utertinneqarnissaat inatsimmi tunngaveqartumik piumasaqaataavoq.

Aammattaaq erseqqissaatigineqassaaq Kangerlussuup eqqaani aqutsiveqarfinni Sisimiuni aamma Maniitsoq umimmanniarnermi kulavaat norrallit aamma tiggaat piniaqqusaanngimmata. Nuup aqutsiveqarfiani sunngiffimmi piniartut piniarfinni Akia-Maniitsumi aamma Ameralimmi imaluunniit Qeqertarsuatsiaani taamaallaat tuttunik tallimanik pisaqarsinnaapput - tamakkerlugit tuttut qulit. APNN-ip piniarfinni pineqartuni nakkutilliineq sakkortusereerpaa.

Naggasiutigalugu APNN-ip inuussutissarsiutigalugu sunngiffimmilu piniartut pisaqarluarnissaannik kissaappai.

Erseqqinnerusumik paasisaqarusukkaanni uunga saaffiginnittoqarsinnaavoq

Immikkoortortami pisortaq Amalie Jessen amalie@nanoq.gl Tlf. 34 53 04