Pisortatut Lise Lennert Olsen atorfinitsinneqarpoq

Aningaasaqarnermut Sulisoqarnermullu Aqutsisoqarfimmi (ASA) pisortatut nutaatut Lise Lennert Olsen atorfinitsinneqarpoq

Atorfinitsitsinissamut ataatsimiititaliami tamanit isumaqataaffigineqartumik innersuussineq tunngavigalugu Lise Lennert Olsen Aningaasaqarnermut Sulisoqarnermullu Aqutsisoqarfimmi (ASA) pisortatut atorfinitsinneqarpoq.

Lise Lennert Olsen Sisimiuni 1959-imi inunngorpoq. 1987-imi Københavns Universitetimi eskimologiimi kandidatitut ilinniarnerminik naammassinnippoq. Ukiut arlallit ingerlanerini pisortani aqutsisutut atorfiit pingaarutillit arlallit atorfigisimavai, ilaatigut Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmi pisortatut kingusinnerusukkullu siullermik Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi pisortatut kiisalu kingorna Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmi pisortatut. Tamatuma kingorna Knud Rasmussenip Højskoliani forstanderiuvoq kiisalu 2017-imi maajimit Aningaasaqarnermut Sulisoqarnermullu Aqutsisoqarfimmi sulisoqarnermut pisortaalluni.

Aningaasaqarnermut Naalakkersuisoq Pele Broberg tassunga atatillugu ima oqarpoq:
”Nuannaarutigingaarpara, ASA-mi aqutsisoqarfimmut pisortatut atorfimmut misilittagalimmik piukkunnaateqartuillu atorfinitsitsinissaq iluatsinneqarmat. Kalaallit Nunaanni pisortani ingerlatsinermi ASA’p sulinera annertuumik pingaaruteqarpoq. Aqutsisoqarfik tassaavoq, Kalaallit Nunaanni pisortani suliassaqarfimmut tamarmut kiisalu suliatigut peqatigiiffinnut minnerunngitsumillu Namminersorlutik Oqartussani sulisorpassuarnut siammasissumik attaveqartartoq. Taamaattumik pingaaruteqarluinnarpoq, aqutsisoqarfimmi pisortap tatiginartuunissaa kiisalu aqutsisoqarfiup iluani kiisalu avataani illuatungerisanut atatillugu suleqateqarnermik ilaatitsilluni siuarsaasinnaanissaa.

Lise Lennert Olsenip ukiorpassuarni misilittagaqarnerminik suliassanik taakkunannga kivitsisinnaanera tatigilluinnarpara, suleqatiginissaanullu qilanaarluinnarpunga”.


Lise Lennert Olsen aqutsisoqarfimmi pisortaagallartutut atorfeqareerpoq, taamaattumillu aqutsisoqarfimmi pisortatut atorfeqarnini erngertumik aallartissallugu.

Annertunerusumik paasisaqarusunnermi attavigineqarsinnaavoq Nikolai S. Christensen, Toqq/direkte 346675, e-mail nsch@nanoq.gl