Uusaqqak akunnitsinniikkunnaarpoq

All.: Kim Kielsen, Naalakkersuisut Siulittaasuat

Aliatsaatigisannik ilisimatinneqarpunga Uusaqqak Qujaukitsoq akunnitsinniikkunnaartoq. Uusaqqak Qujaukitsup nulia, kinguaavi, ilaqutaalu misiginneqatigaakka.

Uusaqqak Qujaukitsoq inuunermi sivisunersaani inughuit sinnerlugit nunatsinni politikikkut aamma inughuit soqutigisaat pisinnaatitaaffiilu pillugit suliniuteqartuarsimanera qujamasulluta ataqqinnillutalu eqqaamassavarput. Uusaqqak piniartutut inuussutissarsiornermi saniatigut ukiorpassuarni inughuit pisinnaatitaaffiisa sorsuutigineqarnerini nunaqqatini sinnerlugit sassartertuusarpoq, tamannalu tunngavigalugu nunaqqatiminit - nunattalu avataani - ataqqisaavoq.

Inughuaq maligassiusoq imaannaanngitsorlu akunnitsinniikkunnaarpoq – Uusaqqak Qujaukitsoq ataqqinnittumik eqqaaneqartarili.