Peqqinnissaqarfimmi quersualerisutut assartuisutullu ilinniarneq

Dronning Ingridip Napparsimavissuata Pisiniarnermut quersuaqarnermullu immikkoortortaqarfiani maanna quersualerisutut assartuisutullu ilinniartoqarsinnaanngorpoq.

- Ilinniarfissaq Peqqinnissaqarfiup Saviminilerinermillu Ilinniarfiup Nuummiittup suleqatigiinnerisigut pilersinneqarpoq, taamak oqarpoq Peqqinnissaqarfimmi pisiniarnermut quersuaqarnermullu immikkoortortaqarfimmi aqutsisoq Ann Kelsen.

Pisiniarnermut quersuaqarnermullu immikkoortortaqarfimmi aqutsisup oqaatigaa suleqatigiinnissamut kajumissaataasimasoq quersuaqarfimmi sulisut ilinniarsimanngitsut, ukiorpassuarni misilittagaqarsimanertik piginnaasaqalersimanertillu aallaavigalugu ilinniarsimasunngorsinnaanissaa tamannalu aqqutigalugu immikkoortortaqarfinni marluusuni ilisimasanik nutaanik aamma peqalissagaluartoq.

- Peqqinnissaqarfik nunami maani ilinniarfiit annersaraat Dronning Ingridillu Napparsimavissuani Quersuaqarfiup pisiniarnermut immikkoortortaqarfittaa eqqarsaatigalugu assigiinngitsorpassuarnik suliaqartoqartarpoq sulisullu ukiorpassuarni sulinikut nalunngilluinnarpaat assartugassat pisiallu peqqinnissaqarfiup iluani qanoq suliarineqassanersut, taamaakkaluartorli ineriartoqqittoqarnissaanut allagartaqarnissaq pingaaruteqarluni, Ann Kelsen nassuiaavoq.

Ilinniartut
Ilinniarneq ukiuni pingasuni ingerlanneqartarpoq ilinniarnerullu ingerlanerani tallimariarluni annerpaamik sapaatip akunnerini aqqaneq-marlunni atuagarsoriartortoqartassalluni. Ilinniarnermi quersuarmi aqutsineq, nioqqutissanik tuniniaaneq pisiniarneq, assartuineq assartugassanik assigiinngitsunik suliaqarnerit ilinniarneqartarput. Tuniniaanermut quersuaqarnermullu immikkoortortaqarfiit ataatsimut marlunnik ilinniartuuteqarsinnaasassapput, ukiorpassuarnilu sulisooreersimasut marluk ilinniakkamik ingerlatsinissamut alloriareersimallutik. Ilinniartuni siulleq Bent Jakobsen 25-inik ukiulik ilinniarnini januari 2018-imi aallartippaa.

- Ilinnialernera pikkorissalerneralu uannut pingaaruteqartorujussuuvoq taamaasiornerami aamma siunissamut eqqanaarinninnerummat, Benti ilinniakkaminik nuannarinneqisoq taamak oqarpoq.

Ilinnialersussallu misilittagartuujulluartup aappaa, Kristian Peterseni, ilinniarnini oktobarimi aallartissavaa.
- Aallartinnissaq pissanganaqaaq erinisoqaangalu, Kristiaat oqarpoq.

Quersualerisutut assartuisutullu ilinniarneq pillugu kti.gl –imi atuaqqissinnaavutit.

Attavissaq
Peqqisutsimut aqutsisut: sundhedsledelsen@peqqik.gl iml. 344300.