Inuusuttut tamaasa oqaloqatigissavagut

Nunatsinni sulisussanik inuusuttunik 2.500 -nik sillimmateqarput, sulilersitassatsinnik.

Aatsitassanut, Suliffeqarnermut, Nunamut Namminermut kiisalu Nunani Avannarlerni Suleqatigiinnermut Naalakkersuisoq Vittus Qujaukitsoq aasaanerani sapaatip akunnerisa ilaanik atuivoq qanimut Majoriamik aamma kommunini borgmesterinik, kiisalu sulilersitsiniarluni suliniuteqartartunik ilinniaqqittarnernillu ingerlatsisunik oqaloqateqartarnermut.

- Kommune Qeqertalimmut aamma Qeqqata Kommunianut tikeraarninni siullermi naammattoortarpakka piumassuseqarlutik inuusuttuaqqanik meeqqat atuarfiannit anisimasunik suliffeqalernissamik siunertaqartunik suliniuteqartut. Tusagassiorfitsigut eqqaaneqartartunit Aasianni aamma Sisimiuni suliniutaasut ingerlanneqartut isumalluarnarneroqaat, - taama oqaluttuarpoq Vittus Qujaukitsoq, maanna Sisimiuniittoq.

Isumalluutigut amerlanerupput

Ukiut tamaasa inuusuttuaqqat 750-it missaanniittut meeqqat atuarfianni naammassisarput, inuunerminnilu kapitalimik nutaamik aallertitsisussaalersarlutik, qinersisussaallutillu ilinniagaqalernissamik imaluunniit suliffittaarnissamik. Kisitsisit kingulliit 2016-imeersut ersersippaat taamaallaat inuusuttuaqqat 14 %-ii toqqaannartumik ilinniarnertuunngorniarnermut imaluunniit inuussutissarsiutinut ilinniakkanut ingerlaqqittartut. 38 % -illi efterskolinut ingerlaqqittarput aammalu 14 %-it suliffeqalertarlutik. Sinneruttut – tassa 34 % -it suliffeqartanngillat imaluunniit ilinniakkamik aallartitsisimassanatik.

Inuusuttuaqqat taakkua amerlasuutigut inuusuttuaqqatut immikkut siunnerfiusutut taaneqartarput, 16-iniit 25-inut ukiullit. Ataatsimut isigalugit inuusuttuaqqat 16-25 -inik ukiullit 37 % -iisa missaat, tassalu 2.500 -missaannik amerlassuseqartut, ilinniagassaminnik aalajangiussisimasanngillat, taamalu maanna ilinniagaqaratik imaluunniit suliffeqaratik.

- Inuusuttuaqqanik siunnerfiusunik sammisassaqartitsiniarluni suliniuteqarnerit Suliffeqarnermut Naalakkersuisutut suliniuteqarfissani pingaarnertaatut isigaakka. Nalunngittariaqarparput taakkua kikkuuneri, qanoq ittunik unammilligassaqarneri, - tassanngaaniillu siunnerfilersugaasunik neqeroorutinik inuusuttuaqqat taakkua tigusisinnaasortaat ilitsersorneqartassapput ingerlaqqinnissaminnik, ilinniagaqalernikkut imaluunniit suliffeqalernikkut. Inuusuttummi taakkua nunatsinni nukissatta pingaaruteqarluinnartut ilagaat, ataatsimoorlutalu taakkua suliniuteqarfigissavagut ingerlaqqinnissaanik, Vittus Qujaukitsoq ingerlaqqippoq.

Pissutsit imminnut assortuuttut
Polar Raajat, Aasianni, oqaluttuarmata ukiuni arlaqartuni suliffissuarminni sulisutik inunnik 30-inik amerliniartarsimagaluarlugit, - tamatumalu ilutigisaanik kisitsisini paasissutissani atuarneqarsinnaappat Aasianni inuusuttoqartoq ilinniagaqanngitsunik imaluunniit suliffeqanngitsunik, taava pissutsinik imminnut assortuuttunik inuiaqatigiinni atugaqarput, inuiaqatigiittut qulaajarluartariaqakkatsinnik. Vittus Qujaukitsoq ataatsimeeqateqartarsimavoq inunnik ulluinnarni ajornartorsiutinik pineqartunik naammattuuisartunik. Ajornartorsiullu taanna pillugu aamma Borgmesteri kissaateqarpoq aaqqiissutissarsinissamut pissutsit qaammarsaavigineqarnissaannik.

- Oqaloqatigiissutigaarput inuusuttoqatigiit taakkua aggersarnissaat, naapikkumallugit tusagaqarfigiumallugillu namminneq pissutsit qanoq isumaqarfigineraat pillugu, qanorlu iliortoqartariaqarnersoq ilinniagaqalernissaannut imaluunniit suliffeqalernissaannut, - taama oqaluttuarpoq Naalakkersuisoq, Borgmester Ane Hansen-imik ataatsimeeqateqareerluni.

Ataatsimoorussanik aaqqiissuteqarnissat
Ajornartorsiutit pineqartut imminnullu assortuuttutut isikkoqartut imaaliinnarluni aaqqiissutissarsiuminaapput, sulisussanik amigaateqarneq, ilutigisaanillu inuusuttut suliffissaaleqisut ingerlatsinngitsullu eqqarsaatigalugit. Ataatsimiinnermi Vittus Qujaukitsoq tusagaqartarpoq unammilligassanik piffissap ilaannaani suliffissaqartarnermi, inissaaleqisitsinermut sulisussanut nutaanut aammalu isumaginninnikkut unammilligassanut tunngasutigut.

- Siunitsinniipput inuiaqatigiinni ajornartorsiutit ataatsimoortut, suliassaqarfiit suliffeqarnermi, kommunini, Naalakkersuisoqarfinni aammalu sulisoqarnikkut kattuffinni suleqatigiinnitsigut aaqqiissutissarsiuuttariaqakkagut, Vittus Qujaukitsoq erseqqissaavoq, maannalu ajornartorsiutit pineqartut pillugit seminareqartitsinissamik piareersaatinik aallartitsisimalluni.
- Maanna immikkut isiginiassavara suliassaqarfimmi tassani sussassaqartunik allanik kommunillu sinnerinik oqaloqateqartarnissara.

Sisimiuni aamma pulaassavagut KTI aamma Aatsitassanut ilinniarfik pikkorissartitsisarnernik amerlasuunik neqerooruteqartartuusut, - taama naggasiivoq Naalakkersuisoq.

Annertunerusunik paasisaqariaraanni attavigineqarsinnaavoq, Suliffeqarnermut immikkoortortaqarfimmi pisortaagallartoq Janus Munk. Mobil: 54 67 78. Email: jmun@nanoq.gl