Europa-Kommissærit, NATO-mi aallartitat aammalu EU-mi Nunanut Allanut tunngassutilinni Allattaanerup tullia ataatsimeeqatigai

Vivian Motzfeldt Europa-Kommissærit, NATO-mi aallartitat aammalu EU-mi Nunanut Allanut tunngassutilinni Allattaanerup tullia Bruxellesimi ataatsimeeqatigai

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup Vivian Motzfeldt Avatangiisinut Imarsiornermut Aalisarnermullu (arferit, puisit Issittorlu ilanngullugit) Europa-Kommissæria Karmenu Vella sisamanngornermi juulip 19-anni ataatsimeeqatigaa. Ataatsimiinnermi Naalakkersuisup Europa-Kommissærillu aalisarnermut arfanniarnermut aammalu puisinik eqqusseqqusinnginnermi naggueqatigiinnut Inunnut atuutinnginnera pillugit eqqartuipput. EU-mi siumut isigisumik Issittumi sulinermi pingaarnersiuineq aamma eqqartorneqarpoq. Pingaartumik issittumi nunat aningaasalersuinissaminni pingaarnersiugaat pillugit nalunaarusiaq Arctic Stakeholder Report ukioq manna saqqummersoq aallaaviginerullugu. 

Tamatuma kingorna Vivian Motzfeldtip Danmarkip NATO-mut aallartitaa Michael Zilmer-Johns taamatullu Norgep Islandillu NATO-mut aallartitai Canadallu aallartitap tullersortaa ataatsimeeqatigai. Ataatsimiinnermi Kalaallit Nunaanni maanna pissutsit illuatungeriinnit ilisimatitsissutigineqarput, NATO-mut apeqqutit aammalu NATO-mi qaffasissumik ataatsimeersuaqqammerneq pillugu ilisimatitsisoqarluni.

Ilinniartitaanermut, Kultureqarnermut , Ilageeqarnermut Nunanullu Allanut Naalakkersuisup Vivian Motzfeldt tallimanngornermi juulip 20-ani ullakkoorsioqatigiiutigaluni EU-mi Siunnersuisooqatigiit ataani Nunanut Allanut Sillimaniarnermullu politikki pillugit Komitémi aallartitat danskit aallartitaat Lars Bo Larsen qaaqqusisoqaralugu ataatsimeeqatigai. Ataatsimiinnermi Pukkitsormiut, Tysklandip, Polenip, Tuluit Nunaat, Finlandillu aallartitai aallartitallu tullersortai, aammalu EU-p Nunanut allanut tunngassutilinni Issittumut aallartitat peqataapput. Ataatsimiinnermi peqataasut nunatsinni pissutsit ineriartornerillu pillugit soqutiginnillutik apersuipput. Nunat taaneqartut tamarmik ilaasortaapput imaluunniit ataavartumik alaatsinaatsutut Issittumi Siunnersuisooqatigiinni inissisimapput. Issittumi Siunnersuisooqatigiinni EU-p ataavartumik alaatsinaatsutut inissisimalernissani anguniagaraa, tamannalu Kalaallit Nunaannit taperserneqarpoq.

Taakku saniatigut Naalakkersuisoq EU-p Nunanut Allanut tunngassutilinni Allattaanerup tullia Christian Leffler aammalu EU-p Issittumut Aallartitaa Marie-Anne Coninsx immikkut ataatsimeeqatigai. Ataatsimiinnermi Kalaallit Nunaata EU-llu Issittoq pillugu soqutigisai aammalu EU-mik suleqatigiinnissamik isumaqatigiissut Brexitilu oqaluuseralugit.

Ataatsimiinnerit pingaarutillit immikkut taasariallit ilagaat Nunat tamalaat akornanni suleqatigiinnermut Ineriartortitsinermullu Europa-Kommissærimik Neven Mimicamik ataatsimeeqateqarneq. Ataatsimeeqateqarneq maanna pisunut attuumassutilerujussuarmik sammisaqarpoq, suleqatigiinnissamik isumaqatigiissutissaq nutaaq Nunallu imarpiup akianiittut Nunallu immokkoortui (OLT-it) isumaqatigiissutaannut ataatsimoortinneqalernissaannut siunnersuut pillugu EU-mi naalagaaffiit ilaasortaasut akornanni isumaqatigiinniarnerit aallarteqqammermata. Ataatsimiinnermi Vivian Motzfeldtip siunnersuutigineqartumut Kalaallit Nunaata soqutigisai pillugit oqariartuuteqarnissaminut periarfissaqarpoq. 

Ataatsimeereernerit kingorna Vivian Motzfeldt ima oqariartuuteqarpoq:

”Tikeraarninni ataatsimiinnerni isumasioqatigiinnermilu ingerlanneqartuni EU-mik suleqateqarnitsinni immikkut soqutigisatta paasilluarneqarsimanissaannut pilersitsisimanissaa naatsorsuutigaara. Immikkut isigalugu EU-p iluani maanna siunissami suleqatigiinnissamut sinaakkutissat, taakkulu aningaasartassaat pillugit isumqatigiinniarnerup ingerlaleruttorneqarnerani.  Pissusissamisuuginnarporlu suliap taassuma ingerlanneqarneranni tunniussaqarsinnaanerput uagullu siunnersuutimut saqqummiunneqartumut tunngavilersukkat paasissallugit pingaaruteqarpoq.”

Nunat tamalaat akornanni suleqatigiinnermut Ineriartortitsinermullu Kommissæriusoq, Neven Mimica, erseqqissaavoq: 

"Europa-Kommissionip Kalaallit Nunaannut qanimut suleqatigiinneq ineriartortinnissaanut pisussaaffeqarnini attappaa, oqaluttuarisaanikkut, politikkikkut kulturikkuttaaq ataavartumik tunngaveqartumik. 

Attaveqatigiinnerput nukittuujuaannassaaq, siunissamut ineriartortinnissaanut qilanaarluta, Kommissionillu Kalaallit Nunaanut aningaasaliisarnera qaffanneqarnissaanut siunnersuut Kalaallit Nunaanni piujuartitsineq tunngavigalugu ineriartortitsinissamut siunertaqarpoq."

Annertunerusumik paasisaqarusukkussi attavigisinnaavarsi:

 Mininnguaq Kleist, mail mikl@nanoq.gl, mobil: +32 499 99 98 58