Tarnikkut napparsimasut inuuniarnikkut atugaasa pitsanngorsarnissaannut Sugisaq aamma Doris isumaqatigiipput

Peqqissutsimut Naalakkersuisoq, Doris J. Jakobsen aamma Sugisaq, Tarnikkut napparsimasut qanigisaasa Peqatigiiffianni siulittaasoq, Esekias Therkelsen, tarnikkut napparsimasut atugaat pillugit eqqartuillutik naapipput.

Qanittumi Dronning Ingridip Napparsimavissuani tarnikkut nappaatilinnut immikkoortortami A1-mi pissutsit pillugit nalunaarusiat marluk, tassa Inatsisartut Ombudsmandiata Folketingillu § 71 naapertorlugu nakkutilliisuisa tarnikkut nappaatilinnik nammineersinnaajunnaarsitsinermut sinaakkutit pillugit allaatigisaat, naapinnermut tunngaviupput.

Peqqissutsimut Naalakkersuisoq Sugisaq-llu siulittaasua isumaqatigiipput tarnikkut napparsimasut nunatsinni atugarisaat pitsanngorsassasut. Nalunaarusiani marluusuni pitsanngorsaanissamut suliniutit, tassaasut A1-mi uninngasunut avatangiisit kiisalu tarnikkut nappaatit pillugit inatsiseqarneq, ersaripput.

»Innuttaasut tarnikkut napparsimasut ilungersunartorsiorput. Inummut namminermut qanigisaanullu ilungersunarpoq «, taama oqarpoq Esekias Therkelsen, nangillunilu. »Dorisilu oqaloqatigiilluarpugut ilisimatippaangalu politikkimini tamanna nammineq pingaartillugu. Tamanna nuannaarutigaara siunissamut isumallualersitsimmat«, Sugisaq-mi siulittaasoq Esekias Therkildsen taama oqaaseqarpoq.

Taamatuttaaq Peqqissutsimut Ilisimatusarnermullu Naalakkersuisup Doris J. Jensenip siunissaq ajunngitsuusutut isigaa.

»Nuannaarutigaara Sugisap saaffigimmanga nalunaarusiat imarisaat tarnikkullu nappaatit pillugit oqaloqatigiumallunga.« Dorisilu nangilluni oqaaseqarpoq, »immikkuullarissuni, soorlu tarnikkut nappaatit pillugit suliniuteqarnerni, pitsanngortoqassappat suleqatigiinnissaq pisariaqarpoq. Suleqatigiinnissaq annertuumik kissaatigaara Esekiasillu ataatsimiinnitsinni tarnikkut napparsimasut qanigisaasalu pisariaqartitaat pillugit saqqummiussinera pingaartippara.«

2019-mi Inatsisartut upernaakkut ataatsimiinnissaannut saqqummiussassamik Peqqissutsimut Ilisimatusarnermullu Naalakkersuisoqarfik tarnikkut nappaatit pillugit inatsisip nutarternissaanik suliaqarpoq. Taamatuttaaq tarnimikkut napparsimasut sullinneqarneranni immikkoortoqarfimmik nutaamik ukioq 2021-ip naanerani naammassisussatut naatsorsuutigineqartumik suliniuteqartoqarpoq.

Paasisaqarnerujumallutit attavigiuk naalakkersuisup allattaa Rosa Thorsen rosat@nanoq.gl +299553303