2018-imi tuttutassiissutit umimmattassiissutillu piniarnissaannullu piffissaliussat

Matumuuna 2018-ip aasaanerani ukiaaneranilu tuttutassiissutit umimmattassiisutillu, taakkulu piniarneqarnissaannut piffissaliunneqartut nalunaarutigineqarput.

Piniarfigineqartartut amerlanerpaartaanni tuttunik umimmannillu ukiuni arlaqalersuni kisitsisoqarsimanngimmat, aammali pisat nalunaarutigineqartarneri amigarpallaartaqimmata, Aalisarnermut, Piniarnermut Nunalerinermullu Naalakkersuisoqarfik, APNN, aalajangerpoq tuttut umimmaallu amerlassusaasa ikileriarnissaannut aarlerinanngitsumik mianersortumillu pisaassiissalluni.

Pinngortitaleriffik Piniarfimmi Sisimiut-Kangerlussuarmi tuttunik umimmannillu 2018-imi marsimi kisitsivoq, kisitsisimanermili nalunaarusiaq suli maannamut naammassineqanngilaq, Pinngortitaleriffillu pisassanik aamma siunnersuisimanani.

Ivittuuni umimmaat tamakkiisuunngitsumik ikinnerpaanilli 2017-imi oktobarimi aamma 2018-imi apriilimi kisitsisoqarpoq, taakkulu tunngavigalugit Ivittuuni umimmattassiissutigineqartut aalajangerneqarput.

Tuttut
1. Piniarfinnut tamanut tunngasoq: Inuussutissarsiutigalugu tuttunniarneq aggustip 1-ani aallartissaaq oktobarip 15-iat ilanngullugu tuttunniartoqassalluni.
2. Piniarfinnut tamanut tunngasoq: Sunngiffimmi tuttunniarneq aggustip 1-ani aallartissaaq septembarip 30-at ilanngullugu tuttunniartoqassalluni. Aqutsiveqarfimmi Nuummi sunngiffimmi piniartumut piniarfimmut ataatsimut akuersissummik ataasiinnarmik tunniussisoqassaaq. Akuersissut ataaseq Piniarfik 3-mut aamma akuersissut ataaseq Piniarfimmut 4-mut imaluunniit 5-imut tunniunneqassaaq. Ataatsimik akuersissuteqartoq tallimanik tuttussinnaavoq.
3. Piniarfik 9 aamma 10 (Kangerluarsorujuk, Nuna Prudhoe kiisalu Nuna Inglefield): Inuussutissarsiutigalugu aamma sunngiffimmi tuttunniarneq aggustip 1-ani aallartissaaq decembarip 31-at ilanngullugu tuttunniartoqassalluni.

Tunngavilersuutit: Sunngiffimmi piniartut piniarnermut allagartamik maajip aallaqqaataa 2017 nallertinnagu akiliisimasut aqutsiveqarfik Nuummeersut 2017-imi tuttunniarnissamut akuersissummik ataasiinnarmik piniarfimmut ataatsimut tunineqarput.
2017-imi akuersissutit 1.022-t tunniunneqarput, 516-it Piniarfimmut Akia-Maniitsoq tunniunneqarlutik aamma 506-it Piniarfimmut Ameralik tunniunneqarlutik.
Akuersissummik tunineqarsimasut taamaallaat 491-it pisaminnik nalunaaruteqarput, 48 procentiullutik. Taamaammat Pinngortitaleriffiup aamma Aalisarnermut, Piniarnermut Nunalerinermullu Naalakkersuisoqarfiup, APNN, nalileruminaatsittorujussuaat piniarfinni pineqartuni tuttut qanoq amerlatiginersut paaseqqissaassallugit tuttoqatigiikkuutaallu qanoq inneri aamma ilisimasaqarfigissallugit, imm. 2 takuuk.

APNN-ip kommunit qanimut suleqatigalugit akuersissutinik pisanik nalunaarsuiffittalinnik utertitsisarneri malinnaaffigivaat. Akuersissutinik pisanik nalunaarsuiffittalinnik siunissami utertitsisanngitsut ukiut tulliinut akuersissummik qinnuteqaraangata tunineqartarnissaat ajornarnerulissaaq.

Umimmaat

4. Aqutsiveqarfik Maniitsoq: Piniarfik 1-imi aamma Piniarfik 3-mi inuussutissarsiutigalugu sunngiffimmilu piniartut aggustip 1-anit oktobarip 15-iat ilanngullugu umimmanniarsinnaapput. Kulavaat norrallit aamma tiggaat tammajuitsussarsiniartunut atugassat piniaqqusaanngillat.
5. Aqutsiveqarfik Sisimiut: Inuussutissarsiutigalugu aamma sunngiffimmi piniartut aggutsip 1-anit oktobarip 15-iat ilanngullugu umimmannik 400-nik piniarsinnaapput. Kulavaat norrallit aamma tiggaat tammajuitsussarsiniartunut atugassat piniaqqusaanngillat.
6. Aqutsiveqarfik Qaanaaq: Piniarfimmi Kangaarsummi inuussutissarsiutigalugu sunngiffimmilu piniartut 40-nik umimmanniarsinnaapput. Piniarfimmi Nuna Inglefield aamma Nuna Prudhoemi inuussutissarsiutigalugu sunngiffimmilu piniartunut umimmattassiissutit allannguuteqaratik 60-iupput. Tiggaat tammajuitsussarsiniartunut atugassat piniaqqusaanngillat.
7. Aqutsiveqarfik Ivittuut: Inuussutissarsiutigalugu aamma sunngiffimmi piniartut aggustip 1-anit decembarip 15-iat ilanngullugu umimmanniarsinnaapput. Umimmannik 2018-imi apriilimi kisitsinermi ikinnerpaaffiliineq tunngavigalugu umimmannik 40-nik pisassiisoqassasoq aalajangerneqarpoq, umimmaat 1-2-ukiullit, angutivissat 16-it arnavissallu 24-t pisassiissutigineqarlutik.
8. Aqutsiveqarfik Sigguk: Umimmaat 2016-imi 2017-imilu pisassiissutigineqartut amerlaqataannik piniartoqarsinnaasoq aalajangerneqarpoq, 150-it piniarneqarsinnaallutik. Tiggaat tammajuitsussarsiniartunut atugassat piniaqqusaanngillat.

Tunngavilersuutit: Qaanaap aqutsiveqarfiani Kangaarsummi (Kap Atholl) inuussutissarsiutigalugu aamma sunngiffimmi piniartut umimmattassaat ikinnerpaaffiliilluni 2015-imi kisitsereernerup kingorna allannguuteqaratik 40-ussapput, imm. 6 takuuk.
Nuna Inglefield umimmanniarfigineqartartoq ilaneqarpoq kujataani nuna Nuna Prudhoe 2017-imi ilanngullugu umimmanniarfigineqarsinnaalerluni, umimmaat amaroqarnera pissutigalu kujavartertalermata, imm. 6 takuuk.
Siggummi inuussutissarsiutigalugu sunngiffimmilu piniartut umimmattassaat allannguuteqaratik 150-iupput, taakku 2016-imi tusarniaareernerup kingorna aalajangerneqarlutik. Piniarfimmi tassani umimmannik ikinnerpaaffiliilluni kisitsisoqartinnagu pisassiissutigineqartut ilaneqassanngillat, imm. 8 takuuk.

Erseqqissaassutigineqassaaq qamuteralaat, ATV-t aamma qamutit motoorillit allat tuttunut umimmannullu malersuutitut atorneqarnissaat piniutiginissaallu inerteqqutaammata. Umimmannik qamuteralaat, ATV-t aamma helikopterit, qulimiguullit atorlugit APNN-imut qinnuteqarsimatilluni akuerineqarsimatilllunilu ungoorisoqarsinnaavoq.

Sunngiffimmi piniarnermut allagartap 2018-imi maajip aallaqqaataa sioqqullugu akilereersimanissaa pillugu piumasaqaat atuuppoq. Sunngiffimmi piniartunut tuttunniarnissamut umimmanniarnissamullu akuersissutit taamaallaat inunnut Kalaallit Nunaanni inuit allattorsimaffianni ukiut kingulliit qulit iluanni ukiuni marlunni ataavartumik nujagarsimasutut allanneqarsimasunut tunniunneqarsinnaanerat pillugu piumasaqaat aamma atuuppoq.

Sukumiinerusumik paasisaqarusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq uunga mail-mut: apn@nanoq.gl imaluunniit AC-Fuldmægtig-mut Nuka Møller Lund-mut, tlf. +299 34 53 45 e-mail: numl@nanoq.gl.

Ilanngussaq uani takuneqarsinnaavoq