Vivian Motzfeldt Bruxelles-imi pingaarnertut oqalugiartuuvoq

Kalaallit Nunaata politikkikkut pingaarnersiuinera aammalu EU-mut attaveqarnera pillugit isumasioqatigiinnermi Vivian Motzfeldt pingaarnertut oqalugiartuuvoq

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq Vivian Motzfeldt juulip 19-anni Bruxellesimi isumasioqatigiinnermi ornigarneqarluartumut pingaarnertut oqalugiartuuvoq, Kalaallit Nunaata Bruxellesimi Sinniisoqarfiannit aaqqissuunneqartumik ilasseqatigiinnermik malitseqartinneqartumik.

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisup Vivian Motzfeldtip isumasioqatigiinnermi Kalaallit Nunaata politikkikkut pingaarnersiugaat aammalu EU-mut attaveqarneq pillugit saqqummiussivoq, taamatullu EU-mut ilaasortaanngikkaluarluni annertusisamik suleqateqalersinnaaneq Naalakkersuisut soqutiginartillugu aamma oqariartuutigaat. Taakku saniatigut Vivian Motzfeldtip Issittumi ineriartornerit iserfigai. Kalaallit Nunaanni Issittumilu attaveqatigiinneq ineriartornerlu pillugit Nunanut Allanut Naalakkersuisoqarfiup pisortaa Kenneth Høegh ilassuteqarluni paasissutissanik saqqummiussivoq. Danmarkip EU-mut ataavartumik sinniisaa, aallartitaq Kim Jørgensen Danmarkip Kalaallit Nunaatalu suleqatigiinnerat pillugu saqqummiussivoq – pingaarnertut EU-mik suleqatigiinnissamut isumaqatigiissut aallaavigalugu, aammattaarli nunat sumiiffii aallaavigalugit politikki aammalu nunat sumiiffii aallaavigalugit periusissiat Kalaallit Nunaannut tunngassuteqartut, Kalaallit Nunaata EU-mut pingaaruteqarneranut tunngassuteqartut saqqummiuppai.
Isumasioqatigiinnerit naammassilerneranni oqalugiaateqartunut apeqquteqarsinnaanermut periarfissaqarpoq, tamannalu amerlasuunit atorluarneqarpoq. Tusarnaariat Europa-Kommissionimit, EU-p Nunanut allanut tunngassutilinni suliaqarfiinneersuupput, EU-mi nunat ilaasortat, soqutigisaqaqatigiit allallu peqataapput. Kalaallit Nunaata Bruxellesimi sinniisoqarfiani pisortaq Mininnguaq Kleist isumasioqatigiinnermi aqutsisuuvoq.

Vivian Motzfeldt ilaatigut ima oqariartuuteqarpoq:
”Kalaallit Nunaannut soqutiginnilluarneq takullugu kajumissaataasorujussuuvoq – pingaartumik inuit EU-p iluani assigiinngitsuni aalajangiisartut peqataanerat. Bruxellesimut tikeraarnermi nunatsinni innuttaasut inooriaasiat inuussutissarsiornermilu ineriartorneq oqaluttuarissallugu pingaaruteqarpoq. Ingammik piffissami matumani EU-p ukiuni 2021 – 2027-mi aningaasatigut missingersuutit EU-mi isumaqatigiinniutigineqarnerata nalaani, tassunga ilaallutik nunatta suleqatigiinnissamik isumaqatigiissutaa Nunat Nunallu Immikkoortui Imarpiup Akianiittut (OLT) isumaqatigiissutaat ataatsimoortinniarneqalernissaannut siunnersuut. Maanna aamma Brexit pillugu isumaqatigiinninniarnerit ingerlapput, Issittormiut peqatigalugit oqaloqatigiinnerit annertusarneqarput, taamaattumik pingaaruteqarpoq kalaallit isumaat soqutigisaallu saqqummiutissallugit malitsigisaannilu tusarnaarianit apersuerusussuseq annertuvoq.”

Annertunerusumik paasisaqarusukkussi attavigisinnaavarsi:
Mininnguaq Kleist, mail mikl@nanoq.gl, mobil: +32 499 99 98 58