Vivian Motzfeldt EU-p Brexit pillugu isumaqatiginninniarnernut Pisortaq ataatsimeeqatigaa

Ulluni 18.-20. juli 2018 Ilinniartitaanermut, Kulturimut, Ilageeqarnermut Nunanullu allanut Naalakkersuisoq Vivian Motzfeldt EU-mi sinniisuutitat qaffasissumik inissisimasut ataatsimeeqatigeqattaarniarlugit aammalu Kalaallit Nunaat pillugu Kalaallit Nunaannilu politikkikkut pingaarnersiukkat pillugit isumasioqatigiinnissaq pillugu Bruxellesimiippoq.

Juulip 18-ani Naalakkersuisup EU-p Brexit pillugu isumaqatiginninniarnermi Pisortaq Michel Barnier ataatsimeeqatigaa. Ataatsimiinnermi ilaatigut Kalaallit Nunaata Brexit pillugu soqutigisai arajutsineqannginnissai anguniassallugit siunertaavoq. Taamatuttaaq Kalaallit Nunaannut tunngassutilinni illuatungeriilluni ilisimatitseqatigiinnissaq siunertaavoq, taamatullu EU-p Brexit pillugu suliniutaasa killiffissiornissai siunertaallutik.

Ataatsimiinnermi Ilinniartitaanermut, Kulturimut, Ilageeqarnermut Nunanullu allanut Naalakkersuisup Vivian Motzfeldtip ilaatigut makku tikkuarpai:

”Tuluit Nunaat EU-mut ilaasortaajunnaarpat aammalu Tuluit Nunaata EU-p niuernikkut isumaqatigiissutaanit anissagaluarpat kalaallit aalisakkanik tunisassiaat siunissami Tuluit Nunaannut eqqunneqarnerminni eqqussinermi akitsuutinik aammalu inuussutissanik misissuinermi nalaanneqartalissapput. Taama pisoqassagaluarpat, Kalaallit Nunaanni suliffeqarfiit pingaarnertut annertuumik eqqorneqarsinnaapput. Kalaallimmi kinguppaannik saarullinnillu tunisassiaat akileraaruserneqannginnerini akii apparneqartariaqartalissammata. Taamaattumik Tuluit Nunaat EU-p niuernikkut isumaqatigiissutaanit anissagaluarpat Kalaallit Nunaata maanna niuernikkut ingerlaa-riaasaa attatiinnarneqarnissaa Naalakkersuisup soqutigisaraa. Tamanna tunngavigalugu Naalakkersuisoq EU-p isumaqatiginninniarnera Kalaallit Nunaannut annertuumik sunniuteqarsinnaanera eqqaamaniarneqarumaartoq neriuutigaa. Tamatumunnga Michel Barnier soqutiginnilluarluni paasinnilluarpoq.”

Naak Michel Barnierip Kalaallit Nunaata soqutigisai isumaqatigiinniarnermi ilaatinneqarnissai neriorsuutigisinnaanngikkaluarai ataatsimut isigalugu Kalaallit Nunaata oqariartuutai inissisimaneralu paasilluarsinnaavai, Tuluit Nunaallu isumaqatigiinninniarnerminni Barnierip qaqinniarpai.

Kalaallit Nunaat EU-lu aalisarneq pillugit suleqatigiinnerat ajunngitsumik ingerlasoq, aammalu politikkikkut illuatungeriilluni pitsaasumik attaveqatigiittoqartoq ilaatigut aamma ataataatsimiinnermi oqariartuutigi-neqarput.


Annertunerusumik paasisaqarusukkuit attavigisinnaavat:
Mininnguaq Kleist, mail mikl@nanoq.gl, mobil: +32 499 99 98 58