EU aalajangigassaannut/isumaqatigiissutissamut siunnersuutaat nutaaq

Billede af det Grønlandske flag

EU-p, Nunat Nunallu Immikkoortut Imarpiup Akianiittullu (OLT) taamatullu EU Kalaallit Nunaallu (suleqatigiinnissamik isumaqatigiissut) suleqatigiinnerannut tunngasunik Siunnersuisooqatigiit aalajangigassaannut/isumaqatigiissutissamut siunnersuutaat tamanut ammasumik Europa-Kommissionimit tusarniutigineqarpoq

Kalaallit Nunaata EU-lu suleqatigiinnissamut isumaqatigiissutaat maanna OLT-nut isumaqatigiissummut atatinneqalernissaa Europa-Kommissionimit pisortatigoortumik siunnersuutigineqarpoq. Tamatumunnga tunngaviuvoq, maanna EU-p ataatsimoortumik isumaqatigiissutai - tassani ataani massakkut avataani aningaasalersuisarnermut atortut (EFI, (Eksterne Finansierings-Instrumenter - suleqatigiinnissamik isumaqatigiissut EFI-uvoq) 60-it sinneqartut affaannanngortinneqassasut. Taakku isumaqatigiissutit 60-nik sinneqartut assigiinngitsunik pitsaassuteqarlutillu piumasaqaateqarmata EU-p pisariillisaanissamut eqaallisaanissamullu nutaamik ingerlaasissamik maanna siunnersuuteqarpoq, pingaartumik allaffissornikkut oqilisaanissaq siunertaralugu.

Suleqatigiinnissamik isumaqatigiissut immikkut allagaataajunnaarluni OLT-nut isumaqatigiissummut allagaatinut ilanngutsinneqarnissaa siunnersuutaavoq. Ataatsimullu allassimasuutigilernerini Kalaallit Nunaat ersarissumik taaneqarpoq – OLT-/suleqatigiinnissamut isumaqatigiissutissap ataani qulequttami – OLT-ni kisiartaalluni.
 
Siunnersuut Siunnersuisooqatigiinnut/Europap Siunnersuisoqatigiivi aammalu Europa-Parlamentimut isumaqatigiinniutissatut akuerisassatullu ingerlateqqinneqassaaq. Siunnersuisooqatigiit aalajangiinissamut/isumaqatigiissutissamut siunnersuut pillugu isumaqatigiinniarnissat sivikinnerpaamik 2019 upernaavata tungaanut ingerlassaaq. Siunnersuisooqatigiit aalajangiffigisassaat/isumaqatigiissutissaq 2021-mit 2027-mut atuutissaaq.

Europa-Kommissioni tamanut ammasumik aggustip 17-nut 2018 killilikkamik tusarniaassaaq, siunnersuummut soqutigisaqartut oqariartuutiminnik tunniussaqarsinnaassallutik.
Soqutiginnittunit amerlanerpaannit tusarniaanermi ilanngussisinnaanissaa aammalu siammasinnerpaamik nunanit EU-mit aningaasanik pisartussanik, EU-milu nunat ilaasortaasut siunnersuisooqatigiit aalajangigassaannut/isumaqatigiissutissamut ilanngussanullu siunnersuutaasunut qisuariaataannik ilanngussisoqarnissaa tusarniaanermi siunertaavoq. Siunnersuummi suliassaqarfiit arlallit sammineqarput.

Siunnersuut ilanngussartaalu danskisut nittartagaq una atorlugu nassaarineqarsinnaapput (kalaallisut nutserneqanngilaq):

Siunnersuisooqatigiit aalajangiussaat/Isumaqatigiissut:
https://ec.europa.eu/info/law/better-regulation/initiative/250979/attachment/090166e5bbad8f2f_da

Ilanngussat:
https://ec.europa.eu/info/law/better-regulation/initiative/250979/attachment/090166e5bbad8f50_da

Soqutigisaqartut Europa-Kommissionimut oqaaseqaatissaminnik nassiussinissaminnut kissaatillit nittartagaq una atorlugu nassiussisinnaapput:

https://ec.europa.eu/info/law/better-regulation/initiatives/com-2018-461_da

Ilisimatitsissutitullu siunnersuisooqatigiit aalajangiussaat maanna atuuttut nittartagaq una atorlugu takuneqarsinnaapput:

Kalaallit Nunaata EU-llu suleqatigiinnissamik isumaqatigiissutaat:
https://eur-lex.europa.eu/legal-content/EN/TXT/PDF/?uri=CELEX:32014D0137&from=EN

Nunat Imarpiup akianiittut Nunasiaataasimasullu EU-mik suleqateqarnerat:
https://eur-lex.europa.eu/legal-content/EN/TXT/PDF/?uri=CELEX:32013D0755&from=EN

Ilismatitsissutigineqassaaq Namminersorlutik Oqartussat tusarniaanermi akissuteqaatissaa ataatsimut katersoriarlugit Kalaallit Nunaata Bruxellesimi Sinniisoqarfiannit Europa-Kommissionimut nassiunneqassammata.


Annertunerusumik paasisaqarnerorusukkuit Bruxellesimi Sinniisoqarfiup pisortaa Mininnguaq Kleist tlf. nr. +32 499 99 98 58, E-mail: mikl@nanoq.gl attavigiuk