Akiliisitsilluni Tuttunniarnermut Umimmanniarnermullu piffissaliussat pisassiissutillu aalajangerneqartut

Akiliisitsilluni Tuttunniarnermut Umimmanniarnermullu piffissaliussat pisassiissutillu aalajangerneqartut.
Aasaaneraniit 2018-mi Ukiuunera 2021-mi ilanngullugu.

Matumuuna 2018-imi aasaaneraniit 2021-mi ukiuunera ilanngullugu akiliisitsilluni tuttunniarnermut umimmanniarnermullu piffissaliussat pisassiissutillu aalajangerneqartut nalunaarutigineqarput, Ilanngussat 1-5 takukkit.

Piniartitsinissamut piffissaliussat pisassiissutillu piffissami 2015-imi aasaaneraniit 2018-imi ukiuunera ilanngullugu atuussimasut aalajangerneqartunut aallaaviupput. Taamaallaalli uumasoqatigiit pillugit ilisimasat nutaat, inuussutissarsiutigalugu, sunngiffimmi aamma tammajuitsussanik piniartut pisassiissutinik, piniarfinnik aamma piniarnissamut piffissaliussanik atuisimanerat kiisalu kommuniniit minnerunngitsumillu tammajuitsussarsiornermik inuussutissarsiortuniit nalunaarutigineqartartut tunngavigalugit annikitsumik aaqqiisoqarluni.

Sisimiut-Kangerlussuaq-mi (Piniarfik 2) marts-mi 2018-mi tuttunik umimmannillu kisitsineq Pinngortitaleriffimmiit ingerlanneqareerpoq marts-milu 2019-mi Akia-Maniitsoq-mi (Piniarfik 4) aamma Ameralimmi (Piniarfik 5) tuttunik kisitsinissaq pilersaarutaalluni soorluttaaq Nunatarsuarmi umimmannik kisitsinissaq. Kisitsinerit pineqartut kisitsinerillu allat inerneri pillugit pisassiissutit aamma piniartitsinissamut piffissaliussat allannguuteqarsinnaassapput.

Inuussutissarsiut siuariartorfiusoq
Tuttunik umimmannillu akiliisitsilluni piniartitsisarneq inuussutissarsiutaavoq siuariartorfiusoq. Akiliisitsillunii piniartitsinermi 2017-mi umimmaat 354-it tuttullu 138-it pisarineqarput. Tamanna 2016-mut sanilliullugu siuariartorneruvoq taamanimi umimmaat 236-iinnaat tuttullu 79-iinnaat pisarineqarsimallutik. Akiliisitsilluni piniartitsineq ukiuni taakkunani Nunatta Karsianut toqqaannartumik aningaasanik isertitaqarfiuvoq.

  Umimmaat
 Akiliutit  Tuttut  Akiliutit
2016
 236-it  312.000 kr.
 79-it  79.000 kr.
2017  354-it  548.000 kr.
 138-it  138.000 kr.

Naalakkersuisoqarfik isumaqarpoq aalajaatsumik ajunngitsumillu sinaakkutissiornikkut inuussutissarsiut annertusiartuinnarumaartoq aamma Kangerlussuup avataani.

Nalunaarut atuuttoq malillugu akiliisitsilluni piniartitsisarneq Kalaallit Nunaanni najugaqavissunit aamma Kalaallit Nunaannut akileraartartunit kisimi aaqqissuunneqarsinnaavoq. Akiliillutik piniariartartut tassaagajupput sullitat europameersut amerikameersulluunniit uumasunik qaqutigoortunik nunarsuarmi sumiluunniit akiliilluni piniarneqarsinnaasunik aningaasarpassuarnik akiliillutik piniarusussinnaasartut. Piniariartut soqutiginerusarpaat tiggaat angisuut utoqqaat taakkulu tammajuitsutut Kalaallit Nunaanniit angerlaanneqarnissaat.

Nunanit allaneersut piniariartartut Kalaallit Nunaanni umimmannik tuttunillu tammajuitsussanik piniarnissaminnut 50.000 kr.-it angullugit atorumasarpaat. Tamanna timmisartunut bilitsit tunineqartut, unnuisarnerit, tammajuitsussanik piniarnissamut aaqqissuisartut ikiortaanullu akissarsiat, Namminersorlutik Oqartussanut akitsuutit, kommuninut aamma Namminersorlutik Oqartussanut akileraarutit il. il. aqqutigalugit inuiaqatigiinnut iluaqutaasarpoq. Tiggaat utoqqaat neqaat inuusunnerusut neqaattulli pitsaatigineq ajorput taamaammallu nalinginnaasumik neqinnanniarnermi piumaneqarpallaaratik. Uumasut utoqqaanerusut aamma alliartuinnarneq ajorput, uumasoqatigiiaallu kinguaariittut ingerlaannarnissaannut atorsinnaajunnaartarlutik. Taamaammat tiggaat utoqqaat tammajuitsussatut piniarfigineqartarnerat kalaallit aningaasaqarnerannut, uumasoqatigiinnut kiisalu neriniartarfinnut iluaqutaavoq. Tammajuitsussarsiornermi piniarnermiit neqi piniartitsisumit tiguneqartarpoq.

Sinaakkutissatut piumasaqaatit
Akilisitsilluni piniartitsinermik aaqqissuisunut pingaaruteqarpoq sinaakkutissatut piumasaqaatit ilisimasaqarfigissallugit piniartitsinissallu piffissaqarluarluni pilersaarusiorsinnaallugit. Tammajuitsussanik piniartut ilarpassui piniariarnissaq ukioq ataaseq sioqqullugu pilersaarusiorusuttarpaat. Tassunga ilanngullugu aaqqissuisut sinaakkutissatut piumasaqaatit pitsaatillugit, piffissamullu ungasissumut pilersaarusiorsinnaanermigut inuussutissarsiummut annerusumik aningaasaliisinnaasarnerat.

Tammajuitsussanik piniartartunut amerlanerpaanut piniartunit allanit akornusersorneqarnatik piniarsinnaasarneq pingaartittarpaat. Piniarnerup nalaani kisimiissinnaanerup misiginissaa pingaartittartorujussuusarpaat. Taamaammat pingaaruteqarpoq piniarnerit inuussutissarsiutigalugu imaluunniit sunngiffimmi piniartunik akornusersorneqanngitsumik ingerlanneqarnissaat neqeroorutigisinnaassallugu. Piniariartarnerit amerlavallaannginneri pissutaallutik piniarfinni arlalinni piniarnissamut piffissaliussat sivisunerulaat pilersaarusiorneqarsimapput. Piffissaliussani akiliisitsilluni piniartitsiffiusartuni ilutigalugulu inuussutissarsiutigalugu aamma sunngiffimmi piniarfiusartuni akiliisitsilluni piniartitsinermik aaqqissuussisartup pisussaaffigivaa piniarfinnik imaluunniit ullunik piniartarnernit allanit akornusersorneqarfiunngitsunik nassaarnissaq.

Piniarfinni ilaanni akiliisitsilluni piniartitsiffiusartuni inuussutissarsiutigalugu sunngiffimmilu piniarneq akiliisitsilluni piniartitsisarnerup nalaani tamakkiisumik ilaannakortumilluunniit ingerlanneqartartussaassaaq. Taamaalilluni akiliisitsilluni piniartitsinermik aaqqissuussisartup inuussutissarsiutigalugu sunngiffimmilu piniartarnerit qaqugukkut aallartittarnersut misissuiffigisassavai, taakkulu naapertorlugit piniartitsinissat piareersarlugit sullitat akiliillutik kissaatigisaat naapertorlugu misigisaqartinniarlugit.

Ilutigalugu ilisimatitsissutigineqassaaq APNN-ip akiliuteqarluni aallaaniarneq aalisarnerlu pillugit nalunaarutip nr. 22, 19. August 2002-imeersoq nutarterlugu aallartereermagu. Nutarsaanermi naatsorsuutigineqassaaq akiliuteqarluni piniartitsinermik aaqqissuisutut akuersissummik pissarsiniarnermi piumasaqaatit sukateriffigineqarnissaat. Aamma piniartitsinermi guide-qartarnermut tunngasunik sukannerusunik piumasaqaateqalissaaq. Kiisalu akiliutinut tunngasut allanngortinneqassapput nalimmassarneqarlutillu.

Sukumiinerusumik paasisaqarusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq uunga: apn@nanoq.gl imaluunniit AC-Fuldmægtig-mut Nuka Møller Lund-mut, tlf. +299 34 53 45 e-mail: numl@nanoq.gl