Landskarsip 2017-imut naatsorsuutai maanna tamanut saqqummiunneqarput

Penge Naalakkersuisut Landskarsip 2017imut naatsorsuutai akuerisimavai.

Naatsorsuutit takutippaat Landskarsip Ingerlatsinermut, Sanaartornermut Taarsigassarsisitsinermullu inernera: ISTmi taaneqartartoq (qallunaatut DAU) 2017imi sinneqartoorsimasoq 204 millioner kr.nik. Naatsorsuutit naapertorlugit 99 millioner kr.nik amigartoortoqarnissaa ilimagineqarsimagaluarpoq, tapiliussatut aningaasaliissutit ilanngullugit. Tassa aningaasartuutissanut missingersiuinerit naapertorlugit annertuumik pitsaasumik inerneqarpoq.

Pitsaasumik inerneqarnera ingammik pissuteqarpoq isertitassatut aningaasaliissutini isertitat 186 millioner kr.nik aningaasartuutissanut inatsit naapertorlugu, tassungalu tapiliussatut aningaasaliissutit ilanngunneqarnerini, inerneri ilimagisamit pitsaanerusimammata. Aammattaaq aningaasaliissutaasartut inatsisinut pituttorsimasut, ingammik isumaginnittoqarfiup iluaniittut, ilimagisamit annikinnerusumik aningaasartuuteqarsimammata.

“Landskarsip naatsorsuutaanni maannakkut sinneqartoorutit akit appasissusiannit pissuteqarput”, Aningaasaqarnermut Akileraartarnermullu Naalakkersuisoq Pele Broberg oqarpoq, nangillunilu:

“Ingerlatsinermut aningaasartuutinut qimataaqqunata, akit appasissuuneri pissutaallutik aningaasarsiornikkut ingerlalluartoqartillugu pingaaruteqarpoq imminut aqulluarsinnaanissaq. Aningaasaqarnikkut ingerlalluarnerup nalaani akit qaffaqqinnissaannut sillimmatissatut ileqqaarisarnissaq pingaartuuvoq. Aningaasaqarnikkut ingerlanerput suli sunnertiasuuvoq, assersuutigalugu aalisakkat isertitsissutigisartakkagut pingaarnerit eqqarsaatigalugit taakku akii allanngoratarsinnaasarput, misilittakkammi aamma takutittuaannarpaat aningaasaqarnikkut ingerlalluarneq atajuaannartuuneq ajortoq.

Aningaasartuutit nutaat pingaarnertut anguniagarissavaat aningaasaqarnikkut sanngiinnerusumik inissisimaffeqartut ikiorserneqartarnissaat, aningaasaliiffigisimasallu kinguneqarluartussat siuarsarneqassasut, taakkumi aqqutigalugit aningaasaqarnikkut allanik isumalluuteqannginnissarput annertusissaaq Landskarsillu aningaasaqarnikkut qajannaatsoq tassuuna pilersissavarput.”


Naalakkersuisut kukkunersiuisui avataaneersut Deloitte, naatsorsuutinik kukkunersiuisutut nangaassuteqanngitsumik oqaaseqaasiorsimapput.

Landskarsip 2017imut naatsorsuutaat Inatsisartunut ukiaru ataatsimiilerpata saqqummiunneqarlutillu akuerineqassapput.

Naatsorsuutit elektroniskinngorlugit Naalakkersuisut nittartagaannut alakkarneqarsinnaanngorlugit ilineqarsimapput Aningaasaqarnermut Naalakkersuisoqarfiup ataani, nittartakkap adressia una iserfigalugu:

http://naalakkersuisut.gl/klGL/Naalakkersuisut/Naalakkersuisoqarfiit/Finans/Landskassensregnskab
Attavissaq: Naalakkersuisup allattaa Qarsoq Høegh-Dam, 34 52 12 aamma mail: qars@nanoq.gl