GUX Aasiaat rektoritaarpoq

Dorthie Siegstad Avannaani Ilinniarnertuunngorniarfimmi Aasianniittumi 1. august 2018 rektoritut atorfinissaaq.

Dorthie Siegstad (in. 1971) Avannaani Ilinniarnertuunngorniarfimmi 1997-imiilli atuartitsinermik suliaqalerpoq, tassanilu ilaatigut ilinniartunik siunnersuisuusimalluni allaffissornermillu nakkutilliisuusimalluni. Kalaallit oqaasiinik ilinniartitsissutinillu kulturimut tunngasunik atuartitsinerup avataasigut ilinniartunik siunnersuisutut ilinniaqqinnikuuvoq aammalu oqaloqatiginnattartutut piginnaasaqarluni. Ilinniaqqinnermini kingullermi ilinniarnertuunngorniarfinnik aqutsinermik aaqqissuussinermillu Syddansk Universitet-imi piginnaanngorsaqqippoq aamma ilinniarnertuunngorniarfinni perorsaanikkut ilinniartitsinikkullu Mastergradimik soraarummeeruteqarsimalluni. Dorthie Siegstadi atorfeqarnermini Aasianni sulisimavoq inooqatinilu marlunnik qitornaqarlutik.

Dorthie oqaaseqarpoq: ”Qilanaarpunga ilinniarnertuunngorniarfik nukittorsarlugu ilinniarnertuunngorniarfimmi suleqataasunik, ilinniartunik aamma angajoqqaanik suleqateqalernissara. Neriuppunga meeqqat atuarfii, ilinniarfiit allat, Aasianni innuttaasut qinikkallu peqatigalugit ilinniarnertuunngorniarfik inuiaqatigiinni nukittorsarneqarumaartoq. Suleqatigiinnermi siunertaajumaassaarmi inuusuttut ilinniagaqarusussusiisa nukittorsartuarnissaat. Inuiaqatigiit kivissinnaajumallugit inuusuttut tamaasa nunatta pisariaqartippai.”

Annertunerusumik paasisaqarusukkuit ilinniartitaanermi nakkutilliisoq, Lotte Sandberg Kjær Ilinniartitaanermut, Kultureqarnermut Ilageeqarnermullu Naalakkersuisoqarfimmiittoq oqarasuaat 345723 aqqutigalugu attavigineqarsinnaavoq.