Imigassaq pillugu inatsit sunniuteqarnissamut piffissaqartariaqarpoq

Peqqissutsimut Ilisimatusarnermullu Naalakkersuisup Doris J. Jensenip imigassamik inatsit nutaaq pillugu inuussutissarsiortut ataatsimeeqatigai. Inuussutissarsiortut kissaatigaat inatsisip piaarnerpaamik allanngortinneqarnissaa. Demokraatit nalunaarutigivaat, ukiaanerani ataatsimiinnissamut, partiip allannguutissatut siunnersuutiginiaraat imigassamut inatsisip ammaannerulernissaa Doris J. Jensenip kissaatigaa inatsit sunniuteqarnissamut piffissaqartariaqartoq.

Inuussutissarsiortut ukuninnga aallartitaasut GE, Brugsen, Pisiffik kiisalu akunnittarfinnut, neriniartarfinnut takornariaqarnermullu brancheudvalgip siulittaasua ataatsimeeqatigeereernermi 11. juni imatut oqaaseqarpoq Peqqissutsimut Ilisimatusarnermullu Naalakkersuisoq Doris J. Jensen.

Inuussutissarsiortut sinniisaat naapikkakkit inatsillu pillugu eqqarsaatersuutaat tusarakkit nuannaarutigaara. Pissusissamisoortutut isigaara inuussutissarsiortut, imigassamik tuniniaanermik sassaalliinermilluunniit aningaasarsiuteqartut, inatsit pillugu isornartorsiuteqarmata, inatsimmi inuussutissarsiortunut nutaanik piumasaqaateqarpoq pingaartumik ussassaarinermut assiaqusersuinermullu tunngatillugu.

Ataatsimiinnitsinni inuussutissarsiortunit periarfissatut ammaanneqarpoq imigassamik atornerluineq pitsaaliorniarlugu siunissami inuussutissarsiortut paasititsiniaanermi inerisaanermik peqataanissaat. Tamanna tapersersornaqaaq.

Inuussutissarsiortut imigassaq pillugu inatsit isornartorsiorpaat. Inuussutissarsiortut ilaatigut isumaqarput Kalaallit Nunaanni immialiat inatsisip ilungersunartorsiortikkai inatsillu imigassamik unioqqutitsilluni tuniniaanermik annertusisitsisoq. Isummat taamaattut inuussutissarsiortut aamma tusagassiuutinut saqqummiunnikuuaat. Isumaqarpunga inuussutissarsiortut – aamma taakkununnga tunngatillugu – aaqqiissutissanik pitsaasunik tapersiisinnaasut.

Kalaallit Nunaanni immialianut tunngatillugu pisiniarfiit sassaallertarfiillu, assersuutigalugu assiaqusersorneqartut iluanni ussassaarinikkut, najukkami immiorfiit suli tapersersornissaannut periarfissaqarput. Inussutissarsiortut imigassanik unioqqutitsinikkut tuniniakkat killilersimaarnissaannut pingaarutilimmik inissisimapput, imigassammi unioqqutitsilluni tuniniakkat amerlanersaat pisiniarfinni pisiarineqartarmata. Innuttaasut aamma uani akisussaaffeqartariaqarput. Akuersissuteqarani imigassamik tuniniaaneq inerteqqutaavoq, ilisimagaannilu unioqqutitsilluni tuniniaasoqartoq tamanna politiinut nalunaarutigineqartariaqarpoq.

Imigassaq pillugu inatsit nutaaq inuussutissarsiortullu ajornartorsiutitut uparuaagaat Imigassaq Ikiaroornartullu pillugit Siunnersuisoqatigiit tulliani ataatsimeeqatiginerani eqqartussamaarpakka.

Uannut pingaaruteqarluinnarpoq erseqqissassallugu Inatsisartuni amerlanerussuteqartut imigassaq pillugu inatsit, ukioq manna 1. marts atuutilersoq, akuersissutiginikuummassuk. Taamaalilluni inatsit taamaallaat qaammatialunni atuunnikuuvoq. Taamaattumik isumaqarpunga inatsisip allanngortinnissaanik oqalunnissaq siusippallaartoq. Inatsit sunniuteqarnissamut piffissaqartariaqarpoq.

Inatsisip siunertaraa imigassamik aalakoornartortalimmik atornerluinerup, peqqissutsitsinnik inuiaqatigiinnilu ajornartorsiortitsisut annerpaartaasa, pitsaaliornissaa. Atornerluineq inuiaqatigiinnut tamanut, pingaartumilli meeqqanut inuusuttunullu, annertuumik kingunerlutsitsivoq.

Inatsit WHO-p imigassaq aalakoornartortalik pillugu sunniuteqarluartumik pitsaaliuineq uppernarsaaserlugu kaammattuutaanik tunngaveqarpoq, pingaartumik imigassap takussaaneranut, pissarsiarineqarsinnaaneranut ussassaarinermullu tunngatillugu. Imigassaq pillugu inatsit Peqqissutsimut Naalakkersuisoqarfiup akisussaaffiata ataani inissisimavoq pinaveersaartitsineq peqqissutsimillu siuarsaaneq inatsisiliornermi ilanngunneqarsinnaaniassammata.

Inuiaqatigiittut qulakkeertussaavarput meerartavut inuusuttortavullu toqqissisimasumik peroriartornissaat, tamannalu pisinnaatitaaffigaat, pingaartumik meerartatta inuusuttortattalu imigassaq pillugu inatsit iluaqutigisussaavaat. Taamaattumik innuttaasut inuussutissarsiortullu qinnuigissavakka inatsimmik tamatumalu siunertaanik maleruaanermikkut ataqqinneqqullugit.


Paasisaqarnerujumallutit attavigiuk naalakkersuisup allattaa Rosa Thorsen oqarasuaat +299 55 33 03 imaluunniit e-mail: rosat@nanoq.gl.