Innarluutilinnut sullissinerup iluani ilisimasat pillugit suleqatigiinneq nukittunerusoq

Naalakkersuisup Anthon Frederiksenip pingasunngornermi 27. juni Innarluutillit najuga-qarfiat, Sødisbakke Mariagerip eqqaaniittoq pulaarpaa.

Anthon Frederiksenip pulaarnermi tunuliaqutaa imannak oqaatigaa: ”Naalakkersuisuni innarluutillit atugaasa pitsanngorsaavigineqarnissaat suliniutigaarput. Ilaatigut inatsisit naleqqussarnerisigut, kisianni aamma ingerlaavartumik innarluutilinnut angerlarsimaf-fiinut sinaakkutit pitsanngorsaavigineqartarnerisigut. Pulaarnerma siunertaraa Naalakkersuisut sulinissaannut paasissutissanik piniarneq. Immikkut pingaartutut isigisimavara nutaamik tunngaviusumik perorsaariatsit nammineq takullugilllu tusarnissaat, sammisassaqartitsinermut neqeroorutaat ineqarnermullu atugassarititaasut ilanngullugit.

Sødisbakkemit suliassaq qilanaarineqartorujussuuvoq. Ukiut marluk matuma siorna kalaaleq siulleq Sødisbakkemi najugaqalerpoq, ullumikkullu Sødisbakke Kalaallit Nunaanniik arfinilinnik najugaqarfigineqarluni.

Sødisbakkep suleqatigineqalernerata ilagivaa sulisunik paarlaasseqatigiittarnissaq, Sødisbakke aallaqqaammut Kalaallit Nunaanniik sulisunik tikittoqassaaq (perorsaanermut ilinniagalinnik).

”Uagutsinnut unammillernarnerpaat ilagaat, ulloq unnuarlu angerlasimaffiutitsinni ilinniarsimasunik sulisoqarnissap qulakkeernissaa, kiisalu pisariaqartitanik ingerlaavartumik piginnaasat qaffassartuartarnissaasa ingerlannissaat. Taamaattumik nuannaarutigisorujussuuara,uani isumaqatigiissutitsinni periarfissaqalersimagatta sulisunik paarlaasseqatigiinnikkut aaqqissuusseqqinnikkut ineriartortitseqqinnissamut” taama oqaaseqarpoq Anthon Frederiksen nangillunilu ”aamma takusinnaavara qanimut suleqateqarnerup annertusarneqarneratigut kulturikkut assigiinngequtitsinnik paasisimasaqarfiginerulernissaa anguneqarsinnaasoq innuttatta Sødisbakkemut pigaangamik misigisartagaasa ilagimmassuk paasissutissanik annertunerusunik pisariaqartitsineq”.

Sukumiinerusumik paasisaqarusukkuit attavigiuk: Judith K. Nielsen, Naalakkersuisumut allatsi, mobil nr. +299 530627.