Naalakkersuisut eqqagassalerineq pitsaanerulersinniarlugu 13,5 mio. koruunit immikkoortippaat

Kommunit najugaqarfinni amerliartuinnartuni eqqakkanik eqqaavissuarnut eqqaaginnaratik, eqqakkanik poortuisarnermik assartuussisarnermillu atuisarnermut ikaarsaarsimalerput. Naalakkersuisut taamatut ineriartortoqarneranut tapersersuinissartik kissaatigaat, taamaattumillu kommunit 2018-imi pingaartumik sulianut, illoqarfinnit nunaqarfinnillu amerliartortunit eqqakkanik illoqarfinni annerni ikuallaavinni akuerisani avatangiisinut mingutsitsinnginnerusumik passutassanngorlugit assartuussinermut tunngasunut tapiiffigineqartassapput.

Namminersorlutik Oqartussat aningaasanut inatsimmiit tapiissutissat atorlugit Kangaatsiamiit, Qasigiannguaniit, Aasianniit, Uummannamiit Upernavimmiit, Kulusummiit, Kuummiuniit aammalu Kommune Kujallermi nunaqarfinniit eqqakkanik assartuussinissamut aningaasaliissuteqassapput. Taakku saniatigut Kommuneqarfik Sermersooq nunamik uuliamik mingutsinneqarsimasumik saliivimmik misiligutaasumik sananissamut tapiiffigineqassaaq, aammalu Qeqqata Kommunia tigooqqaavinnik pitsanngorsaanissamut Sisimiunilu eqqakkanik inissiivimmik nakkutigisamik pilersaarusiornissamut tapiiffigineqassalluni.

Naalakkersuisut 13,5 mio. koruuninit taakkunannga 4,5 mio. koruunit kommunit ataatsimoorlutik eqqagassalerinermi aaqqissutissaannut nutaanut immikkoortinneqarput. Aningaasat taakku ilaatigut qitiusumik eqqagassalerivimmik ataatsimik amerlanerusunilluunniit pilersitsisoqarsinnaanersoq pillugu misissuinissamut atorneqassapput.

Annertunerusumik paasisaqarusunnermi:

Naalakkersuisoqarfimmi pisortaaneq Mette Skarregaard Pedersen tlf: +29936476 e-mail: mesp@nanoq.gl

Tasiilami eqqakkat naqinneqartarput poortorneqartarlutillu, taamaalillutillu Nuummi ikuallaavimmut assartorneqarsinnaalertarlutik.