Nunat Avannarliit Ministeriisa Lundimi ataatsimiinnerat

Aatsitassanut, Suliffeqarnermut, Nunamut Namminermut Nunanilu Avannarlerni suleqatigiinnermut Naalakkersuisoq nunat avannarliit ministeriisa suleqatigiit  ataatsimiinneranni (MR-SAM) Lundimi Sverigimiittumi junip 20-anni peqataavoq.

Allattaanerup 2019-imut missingersuutitut siunnersuutaa 951 MDKK 2018-mut missingersuutinut sinaakkutaasumut assingusoq avannarliit ministeriisa suleqatigiivisa akuersissutigaat. 

”Digitaliseriinermut, nuttarsinnaanermut saqqumilaarsitsinermullu nunat avannarlermiut tulleriiaarinninnerat Naalakkersuisut suliarisaannut naapertuulluinnarpoq, tassani pisortat tapiissutaasa innuttaasunut pissarsiarineqarsinnaanerisa suliarineqarnerinut naapertuullutik. Taamaattumik suliassaqarfinni taakkunani suleqatigiinneq uagutsinnut nutaarsiassaanngilaq” , Naalakkersuisoq Vittus Qujaukitsoq taama oqaaseqarpoq. 

Taassuma saniatigut MR-SAM-imi 2019-mit siulittaasuuffeqarnissaminut atatillugu, Island-ip suliniutissanut pilersaarutini saqqummiuppai. Tassunga ilaalluni Nunat Atlantikup Avannaaniittut pillugit Ineriartornermut Periusissiaq (NAUST).

Naalakkersuisup oqaatigaa, NAUST ukiuni kingullerni suliarineqartoq pillugu, Kalaallit Nunaannit nunani avannarlerni suleqatigiinnermi peqataanermi taanna immikkut pingaartinneqartoq.  Taassuma saniatigut allattaanerup Kalaallit Nunaannik akuersaarluni peqataatitsinera Naalakkersuisup nersualaarpaa.

Nangillunilu Naalakkersuisoq ima oqaaseqarpoq ”nunarsuarmi allanngorartuusumi patajaatsuunissamik pisariaqartitsisumi, ineriartortitsinermik, inuillu pisinnaatitaaffiinik suleqatigiinnermillu ukkatarinniffiusariaqartumi, nunat avannarliit suliaqarnerat tulluarluinnarpoq, nunarsuarmilu nalorninartorsiorfiusumi nunarsuarmioqatigiit suleqatigiinnerannut maligassiuisuulluni.

Avannaamioqatigiit suleqatigiinnerat pitsaasoq pingaaruteqarsimavoq, nunat avannarliit suleqatigiinnerisa saniatigut, suleqatigiiffiusinnaasumik pilersitsiniarnermi, tassani nunat avannarliit avatangiisit pillugit suleqatigiinnerat Issittumi Siunnersuisooqatigiinnit pilersitsinermut pingaarutilimmik siuttuuvoq.   

Malitsigitillugulu nunani avannarlerni nuttartarneq pillugu nalunaarusiaq pissanganartoq saqqummiunneqarpoq, tassani nunani avannarlerni sulisoqarnermut tunngassutillit taputartuunneqarnissaat sammineqarpoq, ilaatigut assersuutigalugu ataatsimut NemID-mik aaqqissuussinikkut, aammalu Avannaani ataatsimut ilinniakkat sulinermilu piginnaasat atortussaatitsinerillu pillugit innersuussutit ilaatigut sammineqarlutik.

Ilanngullugulu Nunani Avannarlerni sanaartornermi teknikkikkut pitsaassutsit ataatsimoorussat, aningaasaqarnerup ilanngutitinneqarnissaanik pilersitsissapput, tassunga ilanngullugu Nunani Avannarlerni allani sanaartornermi atortut atorneqarsinnaanerannut periarfissaqalernissarput.

Annertunerusumik paasissutissanik pisariaqartitsiguit Naalakkersuisoqarfimmi pisortaq Kenneth Høegh attavigisinnaavat, kenh@nanoq.gl, +299565604