Kulturikkut Nersornaat Ida Heinrichimut, Kajumissaasiullu Marc Fussing Rosbachimut

Ukioq manna Kulturikkut Nersornaat operamik erinarsortartumut Ida Heinrichimut tunniunneqarpoq, filmiliortartumullu Marc Fussing Rosbachimut Naalakkersuisut kajumissaatitut nersornaasiuttagaat tunniunneqarluni. Ilinniartitaanermut, Kultureqarnermut Ilageeqarnermullu Naalakkersuisup Vivian Motzfeldtip Katuami nersornaatit taakku marluk Inuiattut Ullorsiorfimmi juunip 21-ani tunniuppai.

Ida Heinrich pillugu Vivian Motzfeldt ilaatigut oqarpoq:

-       Klassiskimik ilinniagaqarnini tunuliaqutigalugu nunatsinni erinarsornikkut kulturitta nutarteriffigineqarnera ineriartortinneqarneralu peqataaffigisimavaa. Inuit amerlasuut erinarsornermigut tuppallersarlugillu qiimmassartarpai. Tamatsinnullu ersarippoq erinarsorneq inuunermini ilisarnaataasa ilagilluinnaraat. Amerlasuunut maligassiuisuuvoq nunatsinnilu inuianni klassiskiusumik nipilersoriaatsimi sallersaalluni

Marc Fussing Rosbach pillugu Vivian Motzfeldt ilaatigut oqarpoq:

-       2017-imi nunatsinni filmi takorluukkanik imaqartoq siullerpaaq ”Akornatsinniittut – Tarratta nunaanni”-mik qulequtalik saqqummersippaa. Filmi namminiinnangajak suliarisani, manuskriptiliorlugu, ilitsersuisuuffigalugu, peqataaffigalugu, nipilersuusiorlugu, killorlugu tigussaasunillu misigisassanik immerlugu suliarisani. Takusassiisarnermi annertuumik piginnaaneqarpoq, aammalu teknikkimut tunngasuni assilissallu qanoq atornissaannut paasisimasaqarluarluni.

Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq. Naalakkersuisut kajumissaatitut nersornaasiuttagaat 10.000 kr-nik aningaasartaqartoq 2016-mi pilersinneqarpoq. Taannalu inuusuttumut piginnaasalimmut Kulturikkut Nersornaasiisoqarnerani aamma tunniunneqartarpoq.

Assit takukkit. (Pdf)

Ilinniartitaanermut, Kultureqarnermut Ilageeqarnermullu Naalakkersuisup Vivian Motzfeldtip kajumissaamik nersornaammillu tunniussinermi oqalugiaataa nuisissinnaavat (Pdf)

Sukumiinerusumik paasisaqarusuttut Ilinniartitaanermut, Kultureqarnermut Ilageeqarnermullu Naalakkersuisoqarfimmeersoq Pia Lynge attavigisinnaavaat oqarasuaatikkut: 345706, imaluunniit e-mailikkut: pily@nanoq.gl

Marc Fussing Rosbachip angalanini pissutigalugu najuusinnaanngimmat kajumissaatitut nersornaasiut anaanaata ernini sinnerlugu tiguaa.