Sulisartunik nunanit allamiunik inatsisinik unioqqutitsilluni atuinermik paasisaqarneq

Nuummi Qapiarfiusaami aneersuartarfinnik iluarsaassinermut atatillugu suliassat suliarineqarnerini entreprenøri inatsisinik unioqqutitsilluni sulisartunik nunanit allamiunik atuisimasoq paasineqarpoq.

Erseqqissaatigineqassaaq, sulisartut Kalaallit Nunaanni suliassanik suliaqarnermi atorneqartut, tamanna pillugu inatsisit naapertorlugit najugaqarnissamut sulinissamullu akuersissutinik pigisaqarnissaannut entreprenøri akisussaasuummat qulakkeerisussaallunilu.

Oqartussaasut akisussaasuusut maanna suliamut akuliutsinneqareerput, taakkulu tamanna pillugu inatsit naapertorlugu aammalu entreprenøri suleqatigalugu entreprenørimut kinguneqartitsisoqassanersoq paasiniaaffigissavaat naliliiffigissallugulu.

Tamatuma peqatigisaanik ilisimatitsissutigineqassaaq, entreprenøri tamanna pillugu iliuuseqareermat, taamaalillunilu sulisartut pineqartut suliassami tassani – imaluunniit Kalaallit Nunaanni suliassani allani – sulisorineqarunnaareermata.

Ineqarnermut Attaveqaqatigiinnermullu Naalakkersuisoqarfiup, ulluni tulliuttuni suliassami tassani sanatitsisutut tamanna entreprenørimut isumaqatigiissummut sunniuteqassanersoq kiisalu suliassamut piffissamut pilersaarummut sunniuteqarsinnaanersoq misissuiffigissavaa. Taamatuttaaq Naalakkersuisoqafiup allannguutaasinnaasut tamaasa pillugit A/S Inissiaatileqatigiiffik INI suleqatigalugu najugaqartunut tamanut paasissutissiisarnissaq qulakkiissavaa.

Naggasiutigalugu ilisimatitsissutigineqarsinnaavoq, Naalakkersuisoqarfimmit pissutsit matuma siuliani taakkartorneqartut ajuusaarutigimmagit, kisiannili tamatuma peqatigisaanik oqartussaasut akisussaasut suliamik isumaginnilernerat naammagisimaarlugu.

Annertunerusumik paasisaqarusunnermi saaffigineqarsinnaavoq, Ineqarnermut Attaveqaqatigiinnermullu Naalakkersuisoqarfimmi suliamik aqutsisoq Embla Kristjánsdóttir oqarasuaat toqq +299 345436, EMKI@nanoq.gl