Tammajuitsussarsiniarluni piniartitsisarnernut akuersissutsinik tunniussineq pillugu nalunaarut

Qeqqata Kommuniani tammajuitsussarsiniarluni piniartitsisarnernut akuersissutsinik tunniussineq pillugu nalunaarut

Naalakkersuisut Qeqqata Kommuniani tammajuitsussarsiniarluni piniartitsisarnermut akuersissuteqarnissanut qinnuteqaatit suliarisimavaat. Naalakkersuisut aalajangerput piniartitsisarnernut akuersissutit qulit tunniunneqassasut.

Naalakkersuisuts tammajuitsussarsiniarluni piniartitsisarnernut akuersissutinik tunniussinerat Qeqqata Kommuniani kommunimut pilersaarummut ilassummik nr. 7-imik tunuliaqutaqarpoq. Qeqqata Kommuniata kommunimut pilersaarummut ilassummi tassani immikkoortissimavai nunaminertat akuersissuteqarfiusinnaasut 12-it, sumiiffinni akuersissuteqarfiusuni Kangerlussuup eqqaaniittut.

Tamanut ammasumik neqeroortitsisoqareerneratigut ataatsimiititaliaq qinnuteqaatinik naliliisussaatitaasoq Qeqqata Kommunianit, Aalisarnermut Piniarnermut Nunalerinermullu Naalakkersuisoqarfimmit aamma Inuussutissarsiornermut Nukissiuuteqarnermullu Naalakkersuisoqarfimmit toqqakkanik inuttaqartoq qinnuteqaatinik tiguneqartunik ataatsimoortumik nalilersuisimavoq. Nalilersuineq ingerlanneqarpoq nalilersuinissamut tunngavissatut aalajangersagaasut aallaavigalugit: Ingerlatsinissanut pilersaarutit, suliassamut ilisimasat aamma misilittakkat, aningaasalersuinissamut pilersaarutit aammalu nunatsinnit aallaaveqarneq. Nalilersuinissami piumasaqaataasut aamma taakkua allaaserineqarneri neqeroortitsinermi atortuni takuneqarsinnaapput.

Peqqissaartumik nalilersuisoqareermat ataatsimiititaliap isumaqatigiilluni Naalakkersuisunut inassutigaa nunaminertat akuersissuteqarfiusinnaasut qulit, aqqaneq marluusunit, akuersissuteqarfiusutut nalunaarutigineqassasut.

Qinnuteqartut nalunaarfigineqarput qinnuteqaat akuersissutigineqarsimanersoq pillugu.

Naalakkersuisoq Aqqalu Jerimiassen oqaaseqarpoq: ”Nuannaarutigaara Qeqqata Kommunia kommunimi takornariaqarnikkut ineriartortitsinissamik kissaataani naapigiarsinnaagakku, qilanaaralugulu kommunimik pitsaasumik siunissami suleqateqarnissara, takornariaqarnikkut suliniutini nutaani”.

Annertunerusunik paasisaqarniaraanni: Naalakkersuisoqarfimmi pisortaq Jørn Skov Nielsen, Inuussutissarsiornermut Nukissiuuteqarnermullu Naalakkersuisoqarfik. Email: jsn@nanoq.gl, oqarasuaat +299 55 61 88.