Timersorneq toqqaruk – hashi naaggaaruk!

Anertikkarneq kiagunnerlu. Iluatsittumik tunniussinermi nuannaarneq. Isertitsinermi iligiit ataatsimoorlutik nuannaarnerat. Timersorneq nuannaartitsisarpoq ataatsimoornermillu misigisaqartitsisarluni. Kalaallit Nunaanni Timersoqatigiit Kattuffiata Peqqissutsimut Ilisimatusarnermullu Naalakkersuisoqarfiup paasititsiniutaanni nutaami, inuusuttut timersornermik toqqaaqqullugit hashimullu naaggaaqqullugit kajumissaarummi, tamanna oqariartuutaavoq.

Nivi, Ari, Milka, Daniel aamma Nukarleq inuusuttuupput tallimat tamarmik immikkut timersuummik aallussilluartuusut neriunaateqartut: Assammik arsarneq, futsal, sulorarneq, Taekwon-Do kiisalu ujakkaarneq. Ilisimavaat timersortartut imminnut piumaffigisariaqarlutillu tamaviaartariaqartut, aamma nalunngilaat timersorneq nuannaarnermik, nukinnik ataqatigiinnermillu tunisisartoq. Timersorneq toqqarpaat hashilu naaggaarlugu. Paasititsiniummi Pan Am 2018 Nuummi juunip qaammataani pisussami isiginnaagassiani naatsuni tallimaasuni oqaluttuat saqqummersinneqassapput. 

- ”Neriuutigaara inuusuttut paasititsiniut timersornermik toqqaanissamut kajumississutigissagaat. Paasititsiniutip siunertaraa inuusuttut amerlanerit peqqinnartumik ataatsimooriaatsimik toqqaassasut hashimullu naaggaassasut. Ilaatigut Islandimit nalunngilarput peqqinnartumik sunngiffimmi sammisaqarnikkut inuusuttut hashimik aanngajaarniutinillu allanik atuilernissaannik pinaveersaartitsisartoq,” taama oqarpoq Peqqissutsimut Ilisimatusarnermullu Naalakkersuisoq, Doris J. Jensen

- ”Meeqqavut inuusuttortavullu, tassa siunissavut, ataatsimoorluta akisussaaffigaavut – taamaattumillu naleqartitat peqqinnartut, innuttaasut peqqissusaannik ineriartortitsisinnaasut sullinniakkattalu peqinnanngitsut pinnagit timersornermik ujartuilernissaannik kajumissisitsisinnaasut, oqariartuutiginissaat pingaaruteqarpoq,” taama oqarpoq Kalaallit Nunaanni Timersoqatigiit Kattuffianni siulersuisut siulittaasuat, Nuka Kleemann.

”Timersorneq toqqaruk – hashi naaggaaruk!”- paasisitsiniut Pan AM 2018-imi aamma Kalaallit Nunaanni pissartanngorniunnermi 2018-imi 2019-imilu takuneqarsinnaavoq. Paasititsiniaanermi ilaatigut allagartanik timersortarfinni nivinngasoqassaaq naatsunillu KNR-ikkut Facebookikkullu isiginnaagassiortoqassalluni. Paasititsiniut suliarineqarpoq Malou Media suleqatigalugu.

Paasisaqarnerujumallutit attavigikkit:

Peqqissutsimut Ilisimatusarnermullu Naalakkersuisoqarfik:

Naalakkersuisumut allatsi Rosa Thorsen oqarasuaat: +299 55 33 03 imaluunniit e-mail: rosat@nanoq.gl

Kalaallit Nunaanni Timersoqatigiit Kattuffiat: Ineriartortitsinermut siunnersorti Aviaaja Geisler oqarasuaat.: +299 34 81 50 imaluunniit e-mail: aviaaja@gif.gl