Isumaginninnermut Inatsisinillu Atuutsitsinermut Naalakkersuisup Anthon Frederiksenip Ilulissaniinnini iluatsillugu utoqqaat innarluutillillu taakku atugaat pillugit eqqartueqatigisimavai.
”Ilulissani Utoqqaat Illuat pulaarpara utoqaallu naapeqatigineranni nuannersumik pissarsiffiulluartumillu paasisassarsiorfigereerlugit Utoqqaat Peqatigiiffiat ataatsimeeqatigaara aamma pissarsiffiulluartumik.
Ataatsimeeqateqarnermi ineqarnermut tunngasut pingaartinneqarput aamma utoqqaat illuata allilerneqarnissaa, atortutigullu isumannaatsumik ullutsinnut naleqquttuunissaa ilanngunneqarluni. Utoqqaat aamma nammineq pisariaqartitaminnik oqariartuuteqarput, utoqqarnut atugassarititaasut pitsanngorsaavigineqarnissaat pillugu, suli angerlarsimaffimminni najugaqartunut tunngatillugu aammalu utoqqalinersiaqarnermi atugassarititaasut pitsanngorsartuarneqarnissaat ilanngunneqarlutik.
Aamma tarnimikkut napparsimasut najugaqatigiiffii marluk pulaarneqarput paasisassarsiorfigineqarlutillu, tassani Naalakkersuisut inatsimmik nutaamik siunnersuuteqarnissaannut innarluutillit atugaasa inatsiseqarnikkut pitsaanerusunik sinaakkutissinneqarnissaat siunertaralugu.
Tassami Inunnik Isumaginninnerup iluani unammilligassarpassuaqarpugut, utoqqaagaanni innarluuteqaraanniluunniit pingaaruteqarluinnarpoq kommunip qanimut suleqatigiinnissaa taaneqartut inuttut pitsaasunik atugassaqartinnissaat anguniarlugu.
Inissatigut atugassarititaasut pitsanngorsarnissaat qulakkiissallugu suleqatigiissutigissuarput, sammisassaqartitsinikkullu neqerooruteqarnerni peqataatitsinikkut, sulisutigullu ilinniarluarsimasut sulisinnaasullu peqataanissaannut periarfissillugit.
Utoqqaat ataatsimeeqatigineranni naqissuserneqarpoq utoqqarnut pingaaruteqartoq sulissutigissagipput, namminneq angerlarsimaffimmiinnissaasa sivisunerpaaffianiitinnissaa”, Anthon Frederiksen oqarpoq
Ulloq naggaserlugu pissarsiffiulluartumik Borgmester Palle Jeremiassen ataatsimeeqatigineqarneqarpoq, ullullu ingerlanerani pulaarneqarsimasut aamma isumaginninnerup iluani pissutsit eqqartorneqarlutik.
Sukumiinerusumik paasisaqarusuttut attavigisinnaavaat Naalakkersuisup allattaa, Judith K. Nielsen, tlf. 530627.