Angallassinermi periarfissat

Simon Simonsenip Kommune Qeqertalimmi borgmesterip Ane Hansen-ip saqqummiussaanut oqaaseqaataa

Borgmester Ane Hansen, Kommune Qeqertalik tusagassiorfinnut nalunaarummi ”mittarfiliortiternissami pissutsit puigukkat”, maajip 26-ani 2018-imeersumi mittarfiliortiternissamut atatillugu angallassinermi sullissinerup ataqatigiinnera pillugu arlalinnik apeqquteqarpoq.

Tassunga atatillugu Ineqarnermut Attaveqaqatigiinnermullu Naalakkersuisoq imatut oqaaseqaateqarpoq:

”Aallarniutigalugu Borgmester Ane Hansen-ip siunissami angallassinikkut kiffartuussinissaq pillugu oqallinnermut ilanngussineranut qutsavigaara. Nuannaarutigaara Ane Hansen nunatsinni angallannikkut pissutsinik pitsannguinissamut, mittarfissat nutaat kingunerisassaannut Naalakkersuisut pingaartitsinerannut isumaqataammat.

Mittarfissat nutaat pillugit oqallinnermi amerlanertigut sumiiffiit, mittarfiit nutaat inissisimaffissaat eqqartorneqarnerusarmata. Tamanna soorunami tunngavissaqarluarpoq. Kisiannili mittarfiliassat soorunami nuna tamakkerlugu inuiaqatigiinnullu tamarmiusunut iluaqutigineqartussaanerat tamatumani allanngortinneqanngilaq. Naalakkersuisummi nuna tamakkerlugu inuiaqatigiinnut tamarmiusunut iluaqutaasussamik nukittorsaanissaq anguniagaraat.

Naalakkersuisutut angallannermut akisussaasutut nutaatut angallasseriaatsitta pitsaasuunissaa ataqatigiinnissaalu pingaarteqaara. Mittarfiit nutaat pisoqqalluunniit immikkut kisimiillutik tamatuminnga kivitsisinnaanngillat.

Maannarpiaq kiffartuussinermut isumaqatigiissuteqarfiusut tamakkerlugit sukumiisumik misissuiffigileruttorpakka, ilisimatitsissutigisinnaavaralu sapaatit akunnerini tulliuttuni sullissisut naapittussaagakkit. Taakkunani angallannerup pitsaasumik ataqatigiissumillu aaqqissuunneqarnissaata qulakkeerneqarnissaa, taamaalillunilu angallannermi kiffartuussinermi kissaatitta pisariaqartitattalu naammassineqarnissaat pingaarteqalugu erseqqissaatigissavara.

Mittarfiit silaannakkullu angallassisut, kiffartuussinermik isumaqatigiissuteqarfiusuni angallassisut aammalu ilaasut akornanni pitsaasumik attaveqaqatigiinnissaq pisariaqartinneqarpoq, aammalu siunissami angallannermut pilersaarusiarineqartussani pilersaarusiornissamut ataqatigiissaarinissamullu annertuumik piumasaqaateqarfiuvoq. Pilersaarusiornermi ataqatigiissaarinermilu suleqataanissara qilanaaraara”.

Tusagassiorfinnut nalunaarut pillugu apeqqutissaqartoqaruni Naalakkersuisup allattaa Steve Sandgreen uunga attaveqarfigineqarsinnaavoq: stes@nanoq.gl.