Kalaallit Nunaanni Meeqqat ulluat juunip aallaqqaataat

Tallimanngorneq juunip aallaqqaataat Kalaallit Nunaanni meeqqat ulluat, ukiut tamaasa pisartoq nalliuttorsiutigissavarput.

Meeqqat inuusuttullu tamarmik asaneqarlutik nuannaarnermik, neriulluarnermik aammalu toqqissisimanermik imalimmik peroriartortariaqarput. Meeqqat inuusuttullu amerlasuut ajunngitsumik peroriartorput. Taamaattorli suli meeqqat inuusuttullu amerlavallaartut atugarliorput. Taamaammat Meeqqat ulluat juunip aallaqqaataani pisartoq, meeqqat inuusuttullu atugarisaasa sammineqarluarnissaannut tunngavissiilluarpoq.

Aningaasanut inatsimmi aningaasanik suliniutinut assigiinngitsunut atugassanut immikkoortitsisoqarnikuuvoq, tassanilu meeqqat inuusuttullu ilaatigut atugarliortitaasut inuunermikkut atugaannik pitsanngorsaanissaq siunertaavoq, assersuutigalugu kommunit meeqqanut inuusuttunullu tunngatillugu sullissisarnerannik tapersersuinikkut kiisalu meeqqanut inuusuttunullu ulloq unnuarlu paaqqinnittarfinnik pitsanngorsaanikkut.

Naalakkersuisut naalakkersuisooqatigiinnissamik isumaqatigiissutaanni meeqqat inuusuttullu atugarliortut immikkut sammineqarput. Ajornartorsiutit pitsaanerusumik aaqqiiviginissaat anguniarlugu Naalakkersuisut kissaatigaat angajoqqaat, kommunit allallu attuumassuteqarsinnaasut pitsaanerusumik suleqatigineqassasut. Meeqqat inuusuttullu tamarmik nuannaarnermik, ne-riulluarnermik aammalu toqqissisimanermik imalimmik peroriartornissaat, Naalakkersuisooqatigiit isumaqatigiissutaanni qitiusumik inissisimasuusoq, anguniagaavoq.

Ilaqutariinnermut politikki nutaaq
”Meerartavut inuusuttortavullu tassaapput massakkut siunissamilu nunatsinni pisuussutitta annerpaartai. Taamaammat Naalakkersuisut ilaqutariinnermut politikkimik nutaamik suliaqassapput, taakkualu siunertaraat angajoqqaat meeqqaminnut piffissaqartitsisunik ilaqutariinnut atugassarititanik pilersitsinissaq. Ilaqutariittut inuuneq aammalu suliffeqarfimmi inuuneq oqimaaqatigiissapput”, Anthon Frederiksen taamak naggasiivoq, juunillu aallaqqaataani Kalaallit Nunaanni, Meeqqat ulluanni tamanut ullorsiorluarnissamik kissaassilluni.

Paasissutissat allat naalakkersuisup allattaanut uunga saaffiginnilluni pissarsiarineqarsinnaapput: Judith Nielsen, oqarasuaat 53 06 27