Doris J. Jensen Issittumi Ilisimatusarnermi Oqallittartoqatigiinnit pulaarneqarpoq

Issittumi Ilisimatusarnermi Oqallittartoqatigiit tassaapput oqallittartoqatigiit Danmarkimi Ilinniarnermut Ilisimatusarnermullu Naalakkersuisup 2013-imi pilersitaa. Oqallittartoqatigiit naalagaaffeqatigiinnermi issittumi ilisimatusarnerup iluani suliaqartunik pingaarutilinnik soqutigisaqaqatigiinnillu ataqatigiissaarisussaavoq, tamatumanilu ilaatigut makku siunertaapput

  • issittumi ilisimatusarnerup iluani suliffeqarfiit suliniutaannik ataqatigiinnerulersitsinissaq
  • susassaqarfiup iluani suliaqartunik pingaarutilinnik soqutigisaqaqatigiinnillu ataqatigiissaarinissaq, aamma
  • susassaqarfiup iluani suleqatigiinnermik pitsanngorsaanissaq isumalluutinillu atuinerup sunniutaanik ersarissaanerunissaq
Oqallittartoqatigiit periusissiamik suliaqarnerminnut atatillugu Nuummi ataatsimiipput, tassungalu atatillugu Peqqissutsimut Ilisimatusarnermullu Naalakkersuisoq Doris J. Jensen ataatsimeeqatigineqarluni. Ataatsimiinnermi Naalagaaffeqatigiinnerup iluani Issittumi ilisimatusarneq pillugu paasissutissanik avitseqatigiittoqarpoq.

Doris J. Jensen ilaatigut oqarpoq oqallittartoqatigiit Nuummi ataatsimiinnissaminnik pingaartitsinerat nuannaarutigalugu, taamaalilluni nammineq Naalakkersuisullu periarfissaqalerput naalakkersuisooqatigiinnissamik isumaqatigiissummi ilisimatusarnikkut anguniakkat ilaat tunniunnissaannut.
”Kalaallit Nunaanni ilisimatusarnerit nunarsuarmi inuiaqatigiinnut, kiisalu nunatsinni, iluaqutaapput, paasisalli atorluarsinnaajumallugit iliuuseqartariaqarpugut. Taamaattumik Naalakkersuisut Nunat tamalaat akornanni Nuummi ilisimatusarnermut kattuffimmik pilersitsisoqarnissaanik sulissuteqartoqarnera iluarisimaarpaat”.
Aamma nangilluni oqarpoq ”Naalakkersuisooqatigiit pingaartikkaat aalisartut, piniartut siulittalu ilitsoqqussaralugu ilisimasaat suli annerusumik ilisimatusarnermi ilanngutitinneqassasut, ataqqinnittumillu pineqassasut”.

Oqallittartoqatigiinni Siulittaasoq, Københavnimi Universitetimi allaffissornikkut pisortap tullersortaa, Morten Pejrup tamatuma kingorna oqarpoq:
”Issittumi Ilisimatusarnermi Oqallittartoqatigiinni siulittaasutut oqallittartoqatigiinnut ilaasortat tamaasa peqatigalugu Nuummut tikeraarsinnaanera assut nuannaarutigivara. Taamaalilluta Kalaallit Nunaata unamminiarnartitaasa qanimut takunissaannut periarfissaqalerpugut. Naalakkersuisumik ataatsimeeqateqarnerput assut pissarsiaqarnarpoq, aamma sammisat maanna sammineqartut, najugaqavissut ilisimasaannik atorluaaneq nutaaliornerlu eqqartorsinnaanerat iluaqutigalugu Issittumi Ilisimatusarnermi Oqallittartoqatigiinni ilaasortaasut pissutsinik paasinnilluarnerulersinnaanngorput.


Paasiniaavissaq Naalakkersuisumut allatsi Rosa Thorsen, toqq 34 66 05, roth@nanoq.gl