Kulturimut aningaasaliissutinikk 2018-imi agguaassineq siulleq

Namminersorlutik Oqartussat kulturimut aningaasaliissutaanniik 2018-imi agguaassineq siulleq

Ilinniartitaanermut, Kultureqarnermut, Ilageeqarnermut Nunanut Allanullu Naalakkersuisup, Vivian Motzfeldt-ip, 2018-imi siullermeertumik qinnuteqaateqartitsinermut atatillugu suliniutinut assigiinngitsunut 31-nut katillugit 4.130.336,00 koruuninik tapiissutinik agguaassivoq. Aningaasat agguaanneqartut aningaasaliiffinniit sisamaniit ataani pineqartuniit agguaanneqarput.

Kulturimut aningaasaliissutit

Kultureqarnermut aningaasanit suliniutinut assigiinngitsunut qulingiluanut 870.000 koruuninik tapiissutinik tunniussisoqarpoq, taakkunannga ilaatigut eqqumiitsulianik saqqummersitsinerit, isiginnaartitsinerit assigisaallu matussusiivigineqarput. Aningaasat inunnit ataasiakkaanit, kattuffinnit il.il. suliaminnut suliniutiminnullu atatillugu qinnutigineqarsinnaapput, pingaartumillu aningaasarsiutigalugu eqqumiitsuliortut ingerlataannut suliniutaannullu suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqarnerusarput.

Filmiliornermik ingerlataqartunut aningaasat

Filmiliornermik ingerlataqartunut aningaasanit filmiliornermik pilersaarutinut arfineq pingasunut katillugit 1.448.000 koruuninik tapiissutinik tunniussisoqarpoq. Filmiliornermik ingerlataqartunut aningaasanit kalaallit filmiliornermik pilersaarutaanut tapiissutinik qinnuteqartoqarsinnaavoq, pingaartumik oqaluttualiornernut piviusuliornernullu.

Atuakkat kalaallisoortut

Atuakkanut kalaallisut allatanik tapiissutaasartunit, suliat arfineq marluk katillugit 1.102.000,00 koruuninik agguaassiffigineqarput.

Kulturimik sulialinnut aningaasaliissutit

Taakkua qaavisigut kulturimik sulialinnut qaammammut agguaanneqartartut 22.000 kr. eqqumiitsuliornikkut suliaqartunut arfineq marlunut agguaanneqassapput.

Suliat aningaasaliiffigitittut allattorsimaffiat una toorlugu nuisinneqarsinnaapput.

Qinnuteqarnissap tullianut piffissaliussaq ulloq kingulleq tassaavoq 1. september 2018. Namminersorlutik Oqartussaniit Kulturimut aningaasaliissutit pillugit sukumiinerusumik paasissutissanik pissarsiniartoqarsinnaavoq nittartakkakkut www.sullissivik.gl -ikkut

Paasisaqarnerorusukkaanni, attavigineqarsinnaavoq kulturimut siunnersorti Mika Lyberth e-mailkikkut mlyb@nanoq.gl imaluunniit oqaruasuaatikkut: +299 34 57 44