Kræftertut anniaataat nipaallisarlugit katsorsaaneq pillugu ph.d.-tut soraarummeerut

Kræftertunik anniaatit nipaallisarlugit katsorsaaneq pillugu ph.d.-tut soraarummeerut oqaluttuarisaanermut pingaarutilimmik pisoqarpoq

Sapaatip akunnerani kingullermi Campus Ilimmarfimmi oqaluttuarisaanermut pingaarutilimmik pisoqarpoq. Inersuarmi inunnik ulikkaartumi Mikaela Augustussenip ph.d-tut soraarummeerutini qulequtaqartoq: ”Palliation til grønlandske kræftpatienter i Grønland og i Danmark.” (Kalaallit Nunaanni Danmarkimilu kalaallit kræftertut anniaataannik nipaallisaalluni katsorsarneqartarnerat) saqqummiuppaa. Mikaela Augustussen kalaallinit siullersaalluni peqqissaasutut ilinniagalittut ph.d-tut ilinniarnertuutut nersornaammik tunineqartussatut innersuussutigineqarpoq.

Mikaela Augustussenip soraarummeerummini kalaallit kræftertut peqqissutsimut atatillugu inuunerminni atugaat misissorpai. Tassunga atatillugu apeqqutinut akissuteqarfissiat nunani tamalaani atorneqarluni ilisimaneqartoq kalaallisuunngortillugu nutsertitani atorpaa.

Mikaela Augustussen ph.d-nngorniarnermi ilaatut qanigisaasut peqqissaanermillu suliaqartut kræftertut inuunerminni atugaat aamma misissorpai. Ilisimatusarnermi ilanngutassiat sisamat saqqummiuppai aammalu soraarummeerumminik naliliisunit nersorneqarluni.

Peqqissutsimut Ilisimatusarnermullu Naalakkersuisoq Doris J. Jensen ph.d.-tut soraarummeerummik saqqummiussisoqarnerani peqataavoq. Saqqummiinerup kingorna ilasseqatigiinnermi ilaatigut ima oqaaseqarpoq:

“Qulequtaq sammisat nappaammik eqqugaasimasunut aaqqeqqissinnaajunnaarsimasunullu isumalerujussuuvoq, tamanna uangattaaq assut uummateqarfigalugu ukiuni kingullerni annertuumik samminikuuara ilaatigut Hospice-t pulaartarlugit Danmarkimilu kattuffimmi siulersuisut ataatsimeeqatigisarnikuullugit.

Nipaallisaaneq – suliniut oqilisaataasoq – suliassaqarfiuvoq pingaarutilerujussuaq. Inuunerminnik navianartorsiortitsisumik napparsimasut nipaallisaanissamik pisariaqartitsisut tassaapput innuttaasut malussarinnerpaasut ilaat. Ilisimatuutut allaatigisannik innuttaasut taakku oqaaseqarsinnaalersippatit. Qujassutissaqarfigaatsigit, aammali misissuininni peqataasut qujassutissaqarfigingaarpagut.

Soorlu misissuinerpit takutikkaa nipaallisaanissamut neqeroorutit pineqartillugit pitsanngorsaasoqartariaqartoq.

Nuannaarutigingaarpara annertuumik kræftimik nappaateqartut inuunermut isiginnittariaasaat misissussallugu toqqarsimagakku, napparsimasunummi nipaallisarneqarnissamut pisariaqartitsisunut siunissami neqerooruteqarnissanik aaqqissuussinissamut kiisalu atugarisanik pitsanngorsaanissaq pillugu ilisimasat taakku pisariaqartippagut.”

Mikaela Augustussenip ph.d-tut allagartani Ilisimatusarfimmi septembarip qaammataani ukiumoortumik nalliuttorsioqatigiinnermi pisortatigoortumik tigussavaa. Suliniut Danmarkimi Kræftens Bekæmpelsimit, Peqqissutsimut Naalakkersuisoqarfimmi ilinniaqqinnermut aningaasaliissutinit kiisalu ilisimatusarnerup siuarsarneqarnissaanut Namminersorlutik Oqartussat aningaasaliissutaannit aningaasalersorneqarpoq.

Aalajangiisussatut ataatsimiititaliaq ukuninnga inuttaqarpoq:

- Professor emerita Torunn Hamran, peqqissutsimut paaqqutarinninnermullu tunngasunik ilinniarfik, Det helsevitenskapelige fakultet, UiT Norgimi issittoq pillugu ilisimatusarfik/UiT Norgga árktalaš universitehta

- Peqqissutsimut paaqqutarinninnermullu ilinniartitsissummi ilinniartitsisuuneq Bente Ervik, Det helsevitenskapelige fakultet, Norgimi issittoq pillugu ilisimatusarfik UiT/ Norgga arktalas universitehta og kreftsykepleier/PhD, nipaallisaalluni katsorsaanermik suliaqartut, Universitetssykehuset Nord-Norge HF

- Nakorsaaneq, Ph.d. Seppo W. Langer, Onkologisk Klinik, Rigshospitalet, København

Annertunerusumik paasisaqarusukkaanni saaffissaavoq naalakkersuisup allattaa Rosa Thorsen, mobil: +299 55 33 03 imaluunniit e-mail: rosat@nanoq.gl