GE Sisimiunut akissuteqaat

All.: Ineqarnermut Attaveqaqatigiinnermullu Naalakkersuisoq Simon Simonsen

“Tusagassiorfinnut nalunaarut, 23. maj 2018-imi GE Sisimiut-nit nassiunneqartoq soqutigalugu atuarpara. Nuannaarutigaara inuussutissarsiornermik ingerlataqartut Kangerlussuup Mittarfiata kommunimit tiguneqarsinnaanera pillugu tapersersuimmata. Eqqarsaat soqutiginartuuvoq, tamannalu pillugu kommunip sukumiinerusumik oqaloqatiginissaanut qilanaarpunga.

Tusagassiorfinnut nalunaarummi GE Sisimiut allappoq, “Ukiuni kingullerni Namminersorlutik Oqartussat aamma Kommuneqarfik Sermersooq angallannermik aallaavilinnik selskabinik arlalinnik pilersitsipput, assersuutitut taaneqarsinnaapput Sikuki Harbour, Kalaallit Airports allallu”. Tassunga atatillugu erseqqissaatigissallugu pissusissamisuussaaq: Ilumoorpoq Sikuki Harbour aktianik piginneqatigiiffiummat, Nuummi umiarsualivimmik ingerlatsinissamik siunertaqartoq. Kisiannili ingerlatseqatigiiffiup illoqarfiit pingaarnersaat kisiat siunnerfigalugu suliniarneranik oqaaseqarneq ilumuunngilaq. Nuna tamakkerlugu kiffartuussinissap pitsaasuunissaa qulakkeerniarlugu, aammalu ”Grønlandshavn”-ip Danmarkimiit Kalaallit Nunaannut nuunneqarnissaa siunnerfigalugu Sikuki Harbour A/S pilersinneqarpoq.

Inatsisartut 2015-mi aalajangiinerat malillugu Kalaallit Airports A/S pilersinneqarpoq mittarfiit nutaamik aaqqissuullugit sanaartortoqarnissaat siunertaralugu. Ilulissani, Nuummi Qaqortumilu mittarfiit nutaat sananeqarnissaat siunnerfigalugu Kalaallit Airports A/S pilersinneqarpoq. Taamaaliornikkut nunatsinni attaveqaqatigiinnermik nutarterisoqartussaavoq, nunarput tamakkerlugu iluaqutaasussamik. Tamannarpiarlu Naalakkersuisut suliassaraat – inuiaqatigiinni ineriartortitsinissamut anguniagassat pingaarnerit pillugit politikkikkut ingerlatsineq.

Kangerlussuup takornariartitsinikkut ineriartortinneqarnissaanut periarfissaqarluarnera isumaqatigaara. Namminersornerullutik Oqartussat nalaanni Kangerlussuarmi mittarfiup inuinnaat angallanneqarnerannut nuunneqarmalli ukiut 30-ingajaat ingerlanerini inuussutissarsiutinik ingerlataqartut namminersortut aaqqissuussarpassuarnik pilersitsisarsimammata tamanna nuannaarutissaavoq. Maanna mittarfiit ilusaat Kangerlussuarmi takornariaqarnerup ineriartortinneqarneranut annertuumik iluaqutaasimasoq qularutissaanngilluinnarpoq.

Kisiannili aamma oqaatigisariaqarpara, Kalaallit Nunaanni nutaaliaasumi tamanna maanna timmisartuusseriaatsimut naleqqukkunnaarsimammat, nunatsinni isorartoorujussuarmi mittarfiup isaarissap ataasiinnaap qitiusumik inissisimanissaa  kialuunniit ullumikkut toqqarnaviarunanngimmagu.

Mittarfiit ilusaannik allannguinissaq akisoorsuusussaammat ilumoorpoq. Nunarsuatsinni sumiluunniit attaveqaqatigiinnermut amerlasuunik aningaasaliisarnerit taamaapput. Kisiannili aningaasaliissutissarpiaat kisimik isiginiarneqartussaanngillat, soorunami aamma taakkunannga pissarsiassat isiginiarneqartussaagamik. Naatsorsukkat tamarmik ersarissumik takutereerpaat, inuiaqatigiit tamarmiusut aningaasaataannik sipaagassaqaannanngitsoq, aammali ilaatigut, ullumikkumut sanilliullugu nunatsinni takornariaqartitsinermi tamarmiusumi angallanneq Kangerlussuakkoortoq pinngitsoorneqarsinnaanngitsuumiittoq, ornigassani amerlanerujussuarni takornariaqarnermi ineriartortitsinissamut periarfissaqartoqalissasoq.

GE Sisimiut allappoq, Namminersorlutik Oqartussat Kangerlussuup mittarfiani iluarsagassatut pisariaqartinneqartut ilisimanngippallaarai. Taamatulli oqartoqarneranut paatsuungasorujussuuvunga.

Naalakkersuisoqarfiga ukiuni kingullerni immikkut ilisimasallit assigiinngitsut Mittarfeqarfiillu suleqatigalugit aningaasaleeqqinnissamut pisariaqartitat uppernarsarniarlugit annertuumik suliaqarsimavoq. Pissusiviusut tunngavigalugit mittarfik Imarpik qulaallugu mittarfimmut piumasaqaatit malillugit ingerlaqqissappat amerlasoorsuarnik aningaasaleeqqinnissamik pisariaqartitsiviusoq pigaarput.

Ineqarnermut Attaveqaqatigiinnermullu Naalakkersuisutut aningaasaliissutaasut amerlanerpaanut ineriartortitsinermik annertusaanermillu pilersitsiviunissaat pingaartippara. Mittarfiit ilusissaat nutaat taamatut kinguneqartussaapput. Aamma Qeqqata Kommuniani minnerunngitsumillu Kangerlussuarmi periarfissat ineriartortinneqarnerisa ingerlaqqinnissaat uannut pingaaruteqaqaaq.

Kangerlussuarmi umiarsualivissap nutaap pilersaarusiorneqarnera ingerlallualeruttorpoq. Naalakkersuisooqatigiinnissamut isumaqatigiissummi allassimavoq, Sisimiut Kangerlussuullu akornanni aqquserniassatut qangaaniilli pilersaarutigineqartup piviusunngortinneqarnissaa sulissutigineqassasoq. Sisimiut Kangerlussuullu akornanni aqquserniassamut eqqarsaatit soqutiginaatillit kommunip aamma Namminersorlutik Oqartussat akornanni ataatsimoortumik suleqatigiissitami suliarineqarput.

GE Sisimiut allataatut, nunap immikkoortui tamarmik sapinngisamik ineriartortinniarneqarnissaat aammalu nunap immikkoortuinik allanik pilliuteqarnani nunap immikkoortuinik ineriartortitsinissaq pingaaruteqarpoq. Tamannarpiarlu peqqutigalugu attaveqaqatigiinnermut tunngasut nutaat naleqquttullu pisariaqartinneqarput – tamatumalu peqatigisaanik Qeqqata Kommuniani umiarsualivimmut aqqusinermullu suliniutit nutaat ingerlateqqissavagut.

Piaartumik Qeqqata Kommunianiit aallartitanik ataatsimeeqateqarnissara, aammalu qanittumik suleqatigiinnissamut qilanaarpunga. Sapinngisamik piaartumik ataatsimeeqatigiinnissarput pillugu Borgmesteri isumaqatigiissuteqarfigereerpara.”

Sukumiinerusumik paasisaqarusuttut attavigisinnaavaat Naalakkersuisup allattaa Steve Sandgreen e-mailikkut stes@nanoq.gl imaluunniit oqarasuaat angallattagaq 59 66 59 sianerfigalugu.