Nukingiussatut suliarinninnissaq piumasaqaatigineqanngilaq

All.: Ineqarnermut Attaveqaqatigiinnermullu Naalakkersuisoq Simon Simonsen

“Ataasinngorneq ulloq 28. maj 2018 Mittarfiliornissaq pillugu Inatsisartut inatsisissaattut siunnersuut siullermeerneqarpoq. Partiinit tamaginnit pimoorussineq annertooq malugalugu nuannerluinnarpoq.

Erseqqissassuara mittarfiliornissaq pillugu inatsimmut sinaakkutissap saqqummiunneqarnera, Ilulissani, Nuummi aamma Qaqortumi mittarfiliornissamut aalajangiinissamut suliap ingerlanerani tamarmiusumi alloriarneq siullersaanngilluinnarmat imaluunniit kingullersaanngilluinnarluni.

Nunatsinni politikerit tamaasa eqqaasittariaqarpakka, angallannerup nutaamik ilusiligaanissaa pillugu oqallinneq aammalu taassuma suliarineqarnera sivisoorsuarmik ingerlasimammat. Assartuussineq pillugu Isumalioqatigiissitaq 2009-imi pilersinneqarpoq – ukiut arfineq sisamat matuma siorna – aammalu 2011-imi isumaliutissiissutiminik saqqummiilluni.

Mittarfinnik nutaanik pingasunik makkuninnga takissusilinnik: Ilulissani 2200 meteri, Nuummi 2200 meteri aamma Qaqortumi 1500 meteri, pilersaarusiornissamik sanaartornissamillu Inatsisartut 2015-imi Naalakkersuisut ersarissorujussuarmik suliakkerpaat.

Naalakkersuisut soorunami tatigineqarnertik ataqqillugu Inatsisartut aalajangiinerat malippaat aammalu 2015-imiilli suliassaq ingerlaavartumik siunnerfilimmillu suliarisimallugu.

Politikkikkut partiit assigiinngitsut suliap ingerlanerani politikkikkut suliaqarnermi ingerlaavartumik akuutinneqartarsimapput.

2016-imi juunimi siullermik Naalakkersuisut tulliullutillu Inatsisartut Aningaasaqarnermut Akileraartarnermullu Ataatsimiititaliaata, Kalallit Airports A/S-ip pilersinneqarnissaa akueraat. Ingerlatseqatigiiffik ataatsimik suliassaqartoq 1/7-2016 pilersinneqarpoq, tassalu mittarfinnik Inatsisartut 2015-imi Naalakkersuisut aallartitseqqullugit pisussaaffiliussaattut angissuseqartunik pilersitsinissaq, sanaartornissaq ingerlatsinissarlu. Tassa imaappoq Ilulissani 2200 meteri, Nuummi 2200 meteri aamma Qaqortumi 1500 meteri.

Maannamut aalajangiisarnerit kingunerisaannik Kalaallit Airports A/S-ip mittarfiit sanaartornissaannut pilersaarusiorneq, entreprenørinik piareersaataasumik piukkunnartussarsiuussineq aammalu suliariumannittussarsiuussinermut najoqqutassat annertuut, neqeroortitsinermut tunngavigineqartussat, suliarai.

Kalaallit Airports A/S mittarfissani taakkunani pingasuni akigititassap aalajangersimasumik paasinissaanut pisariaqartumik, suliariumannittussarsiuussinermik ingerlatsisussanngorpoq. Tassunga ilanngullugu Kalaallit Airports A/S aningaasalersuinissamut pisariaqartitsineq aamma aningaasalersuinissamut atugassarititaasut pillugit aalajangersimasunik oqaloqateqartussaavoq. Oqaloqateqarnerit taakkua naammassereerpata aatsaat aammalu neqeroortitsereernerup kingorna suliariumannittussarsiuussinerup inernera paasinarsippat, inernerinut aalajangersimasumik isummertoqarsinnaalertussaavoq.

Kalaallit Airports A/S-ip aningaasalersuinissamut aaqqiissutissat pillugit isumaqatiginninniarnerit aamma suliariumannittussarsiuussinerup inerneri pissarsiarereerpagit, taakkua Naalakkersuisunut aammalu Inatsisartut Aningaasaqarnermut Akileraartarnermullu Ataatsimiititaliaanut suliarineqartussanngorlugit saqqummiunneqartussaapput.

Inatsimmut sinaakkutissamut pisussanngortumut tunngaviusoq tassaavoq, aalajangiinerit 2018-imut Aningaasanut Inatsisip, novembari 2017-imi suliarineqartup akuerineqartullu, akuerineqarneranut atatillugu Inatsisartunit akuerineqareersut, aalajangersarneqarnissaat.

2018-imut Aningaasanut Inatsimmi oqaasertaliussat Naalakkersuisunut piginnaatitsiviupput aammalu suliap ingerlateqqinnissaanut sinaakkusiisuullutik, kisianni inatsit sinaakkusiussaq piffissamut ukiunik arlalinnik sivisussuseqartumut piginnaatitsissuteqarnernik aalajangersaaviussaaq.

Inatsit sinaakkusiussaq suliap ingerlanerani paasiuminartitsinerusussaavoq, inatsimmi immikkoortumi suliarineqarluni aammalu aningaasanut inatsimmi oqaasertaliussanut ilaatinneqarani.

Ilaatigut allatut mittarfik takissusilerlugu mittarfiliortoqartariaqaraluartoq – imaluunniit allatut oqaatigalugu suliassat allarluinnaasariaqaraluartut - nipiliuutigineqarpoq. Naak tamakkua aalajangiinerit partiit assigiinngitsut siusinnerusukkut aalajangeeqataaffigisaat?

Ilaatigut Mittarfiliornerit aaqqissuunneqarneranni piffinni najugaqavissunik sulisoqarnissaq aallaavigineqartariaqartoq, nipiliuutigineqarpoq. Tamanna salliukkusunnarnerusoq isumaqatigisorujussuuara. Kisiannili GE-mit paasitinneqarpunga, annertunerpaatigut sanaartornermik inuussutissarsiortut iluanni suliffissaaleqisoqanngitsoq. GE paasissutissiivoq: ”Sulisussaaleqinerup suliffeqarfiutitsinni siuariartortitsinissaq kigaallatsippaa, tamannalu annertunerpaatigut inuussutissarsiorfiit tamarmik iluanni atuuppoq; Illuliortiterneq, aalisarneq aamma nunami tunisassiorneq, kiffartuussinermik inuussutissarsiutillit, akunnittarfiit aamma neriniartarfiit il.il.”

Tassunga tunngatillugu paasissutissiissutigisinnaavara, Kalaallit Airports A/S nunani tamalaani atugassarititaasut tunngavigalugit mittarfinnik sanaartornissap neqeroortitsiviginissaanik pilersaaruteqarmat aammalu suliassamut entreprenørinik piukkunnartussarsiuussereersimalluni. Tassunga ilanngutissaaq illutassaannik il.il. sanaartornissaq, atugassarititaasut nalinginnaasut tunngavigalugit neqeroortitsivigineqartussaq.

Naggasiutigalugu erseqqissassavara, maannakkut mittarfiit ilusiligaanerannik allanngortitsinissaq annertuumik pisariaqartinneqartoq Inatsisartuni tunngaviusumik isumaqatigiissutigineqartoq paasillugu nuannaarutigigakku.

Siunissami mittarfiit ilusiligaanerata ataqatigiissuunissaa, tutsuiginartuunissaa ullutsinnullu naleqquttuunissaa sulissutigissagipput tunngaviatigut isumaqatigiissutigineqarpoq.

Naggataatigut paasissutissiissutigissavara, pingasunngorneq ulloq 30. maj 2018 nal. 11.00 tusagassiortunik katersortitsissagama, tassani soqutiginnittut tamarmik qaaqquneqarlutik.”

Sukumiinerusumik paasisaqarusuttut attavigisinnaavaat Naalakkersuisup allattaa Steve Sandgreen e-mailikkut stes@nanoq.gl imaluunniit oqarasuaat angallattagaq 59 66 59 sianerfigalugu.