Doris peqqinnerulernissamut suliniutinut aaqqissuinernullu aningaasanik tunniussivoq

Sap.ak. 18-imut Inuuneritta Pulje-mullu qinnuteqartorpassuit Naalakkersuisut nutaat atuutilernissaannut pissangallutik akissutissarsinissaminnut utaqqisimapput. Maanna pissangasariaarupput, Peqqissutsimut Ilisimatusarnermullu Naalakkersuisoq Doris J. Jensen maanna aningaasat agguaateqqammerpai.

- ”Sap.ak. 18 aamma Inuuneritta Pulje suliarileqqitassatut qilanaarisama ilagisimavaat. Pitsaasumik peqqinnartumillu inuuneq ataatsimoorluta pilersissinnaavarput taamaattumillu nuannaartarpunga tulluusimaartarlungalu nuna tamakkerlugu qinnuteqartorpassuit takugaangakkit. Tamatuma takutippaa nunatsinni najugarisaminni allannguuteqarusuttunik nukissaqartoqartoq,” taama oqarpoq Peqqissutsimut Ilisimatusarnermullu Naalakkersuisoq, Doris J. Jensen.

Sap.ak. 18 imertariaatsitsinnik ukkassineruvoq. Ukiut tamaasa sap.ak. 18-imi aaqqissuinissamut tapiissutissanik qinnuteqartoqarsinnaavoq. Ukioq manna Peqqissutsimut Ilisimatusarnermullu Naalakkersuisoq Doris J. Jensen qinnuteqaatit illoqarfinnit quliusunit nunaqarfinnilu 20-usunit aaqqissuussinissamut tapiissutinik qinnuteqaatit akuerai.

Inuuneritta Pulje najugarisami pitsaaliuinermut peqqinnerulernissamullu suliniutinut atorneqartarpoq. Ukioq manna Peqqissutsimut Ilisimatusarnermullu Naalakkersuisoq, Doris J. Jensen suliniutinut 26-nut tapiivoq. Suliniutinut tapiissutinik tigusaqartut uku ilaagaat:

  • Paamiuni Ittoqqortoormiinilu meeqqat aasami asiarnerat

Camp West aamma Camp East Paamiuni aamma Ittoqqortoormiini pissaaq. Suliniut Foreningen Grønlandske børn-imi kajumissutsiminnik sulisut peqatigalugit ingerlanneqassaaq.

Suliniutip siunertaraa meeqqanut inuusuttuaqqanullu eqeersimaartumik, nuannersumik unamminiarnartumillu aasarsiortitsinissaq, tassanilu angajoqqaat sapaatip-akunnerata naanerani peqataanissamut qaaqquneqarumaarput.

  • Niaqornaarsummi peqqinnartumik inooriaaseq

Niaqornaarsummi atuarfik, Atuarfik Kristian Lundblad, timip aalatinnissaanut peqqinnartunillu nerisaqarnissamut pilersaaruteqarput. Assersuutigalugu kalaallit nerisassiaataat naatitallu ukkatarineqassapput, nerisassat timillu aalatinneqarnera pillugu saqqummiussisoqassaaq, eqimattakkaarluni suliaqartoqassaaq innuttaasunullu katersortarfimmi suleqatigiit eqimattakkuutaarnermi ilikkakkaminnik saqqummiussissapput. 

  • Qaqortumi Aalasa

Suliniutip pingajuat Qaqortumi ”Aalasa” timersuummut crossfit-imut atortussanik taperneqarpoq. Suliniut Aalasa kajumissuseq tunngavigalugu suliarineqarpoq, tassani innuttaasut tamarmik atuarfiup eqaarsaartarfiani timi aalatikkiartorsinnaallugu. Suliniutip siunertaraa pujortartarneq, imigassaq aalakoornartulik, ikiaroornartumik pualavallaarnerlu pitsaaliornissaat.

Inuuneritta Pulje sap.ak. 18-nilu pillugit uani paasisaqarnerusinnaavutit: www.peqqik.gl

Paasisaqarnerorusukkuit naalakkersuisumut allatsi Rosa Thorsen oqarasuaat: +299 55 33 03 imaluunniit e-mail: rosat@nanoq.gl aqqutigalugu attavigineqarsinnaavoq