Immikkoortortami nutaami ilaqutariit inortumik meerartaartut ikiorneqassapput

Dronning Ingridip Napparsimmavissuani K3-p ilaani immikkoortortami nutaami ilaqutariit inortumik meerartaartut ikiorneqassapput

Marlunngorneq maajip ulluisa 15-anni Dronning Ingridip Napparsimmavissuani immikkoortortaq nutaaq ammarneqarpoq. Anaanaq meerarlu, aallaqqaammut nakorsarneqarnikkut allatigullu inorluni inunngortumik meerartaqarluni ilaqutariittut inuunermut, ikiorserneqarlutillu tapersersorneqassapput.
Peqqissutsimut Ilisimatusarnermullu Naalakkersuisoq Doris J. Jensen immikkoortortamut nutaamut qalersamik kipisisuuvoq.
- Nuannaarutaaqisumik inuiaqatigiinnulu annertuumik iluaqutaasussamik ullumi FN-ip ilaqutariinnut ullorititaani immikkoortortaq ”Inerittussat” atoqqaartitsipparput. Inorluni inuusumik meerartaarneq aallaqqaammut kingornalu meeqqap peroriartornerani ilaqutariinnut unammilligassaasinnaavoq annertooq. Inorlutik inuusut ilaqutaasullu aallartilluarnissaannik qulakkeerinikkut meeqqap pitsaanerpaamik peroriartornissaata periarfissinnissaa qulakkeerneqassaaq. Ilaqutariittut ataqatigiinneq nukittooq taamaalillunilu peqqinnartumik ilaqutariittut inuunissamik siunissami qaninnermi ungasinnermilu inerisaaneq qulakkeerneqassaaq, Peqqissutsimut Ilisimatusarnermullu Naalakkersuisoq Doris J. Jensen taama ilaatigut oqalugiarpoq.

Neqeroorut nutaarluinnaq
Aqutsisoqarfiup pisortaata Malene Marie Nielsenip immikkoortortap nutaap ammarneqarnera nuannaarutigalugu oqaatigaa
- Tulluusimaarluta neriuuteqangaarlutalu ammaanissaq qilanaarisimavarput. Angerlarsimaffippalaangajattumi inorlutik inuusunik paaqqutarinninnermi ilaqutariinni taakkunani angajoqqaanut atassuteqarnermik ikorfartuineq kivinneqarsinnaanngorpoq ukkanneqarnerusinnaanngorlunilu. Paaqqutarinninnissamut ikorfartuinissamullu- anaanamut meeqqamullu eqqissinartumik- immikkoortortaq nutaaq avatangiiseqartitsivoq. Meeqqat taakku malussarissuupput, alliartornissaminnut eqqissisimatitassat, sunnertinnerpassuarnut kigaatsumik sungiussiartuaarnissamut immikkut pineqarnissamik piumasaqaateqartut. Immikkoortortaq nutaaq immikkut ilsimasalinnik sulisoqassaaq, avatangiisit anaanap meeqqallu imminnut qaninnissaannut periarfissiipput, inuunermi nutaami aallartilluarnissaat siunertaralugu meeraq angajoqqaallu ikorfartorneqassapput, Aqutsisoqarfiup pisortaa Malene Marie Nielsen oqarpoq.

Immikkoortortaq
Immikkoortortaq nutaaq ilaqutariinnut marlunut inissaqarpoq. Anaanamut meeqqamullu ilaqutarinnut ineqarpoq ataatsimoorussamillu ineqarluni, igaffeqarpoq uffarfeqarlunilu. Immikkoortortaq peqqissaasunit, sundhedsassistentinillu immikkut ilisimasalinnit ernisussiortunillu sullinneqarpoq.

Ulloq manna tikillugu inorlutik inuusut peruluttunut immikkoortortami uninngasarsimapput. Inoqalutik inuusut piffissami sivikinnerusumi sivisunerusumiluunniit peruluttunut immikkoortortamiinnissaat suli pisariaqarsinnaavoq, amerlanerpaanulli immikkoortortaq nutaaq peqqissaanermi nakorsaanermilu qitiussaaq. Inorlutik inuusut sullulikkut nerisinneqartarput immikkoortortamilu sulisunit immikkut ilisimasalinnit tapersersorneqarlutik nakkutigineqarlutillu paaqqutarineqartarlutik. Sulisut taakku inorlutik inuusunik sullissisuusut meeqqanut angajoqqaanullu periarfissanik pitsaanerpaanik pilersitsinissamut ilinniagaqassutsikkut annertuunik ilisimasaqarput soqutigisaqarlutillu. Pingaartumik angajoqqaat namminneq meeqqaminnik isumaginninnissaannik ilitsersuunneqarnissaannut -taamaalilluni inuunerup aallartilluarnissaanut meeqqamut tunniussinissamut- immikkoortortaq nutaarluinnarnik periarfissiivoq.
”Grobørn” immikkoortortamut taaguusiunneqarallarpoq, suliffeqarfiulli iluani unammisitsinikkut atissaa aalajangerneqassaaq.

Attavissaq: Aqutsisoqarfiup pisortaa Malene Marie Nielsen oqarasuaat: +299 34 43 00 imal. e-mail: sundhedsledelsen@peqqik.gl