Nunatsinni Naligiissitaanermut Ullorititaq 2018

Naligiissitaanermi naligiimmik periarfissaqartinneqarnissaq pingaartinneqarpoq. Taamaattumillu inuiaqatigiinni ataatsimut isigalugu naligiinnginnerup  annertusiartornera akiorniarlugu sutigut tamatigut iliuuseqartariaqarpugut. Tamatuma peqatigisaanik suiaassutsit akornanni naligiittoqarnerulernissaata qulakkeerneqarnissaa suli eqqumaffiginiartariaqarparput. Naligiissitaanermut suliassaqarfimmut Naalakkersuisumit akisussaasumit Doris J. Jensenimit 20. maj 2018-imi Nunatsinni Naligiissitaanermut Ullorititami pingaarnertut oqariartuutit taakkuupput. Doris J. Jensen ima nangippoq:

Naalakkersuisooqatigiinnissamut isumaqatigiissummi qulequtarineqarpoq ”Nunarput- ataatsimoorfiusoq- ineriartorfiusoq - tamanut inissaqartitsisoq”, taassuma imaralugit Naalakkersuisut ukiuni tulliuttuni sisamani anguniagassatut suliniutigissallugit pisussaaffigisaat. Peqatigiinneq pitsaasuussappat nunatsinni innuttaasut inuiaqatigiinni atugarissaarnikkut sullinneqarnikkut naligiimmik periarfissaqartinneqarnissaat kiisalu suiaassuseq, atoqatigiinnikkut sumut sammiveqarneq, sumit kingoqqisuuneq najugaqarnerluunniit apeqqutaatinnagit ineriartuuteqarnissamut assigiimmik periarfissaqarnissaq pingaaruteqarpoq.

Naligiinngitsumik inissisimaneq peqatigiinnermut akornusersuutaasinnaavoq, tassa avissaartitsillunilu ilungersuuteqartitsilernerup saniatigut peqqissutsitsinnut sunniuteqartarpoq aamma ineriartornissamut periarfissatsinnut pitsaanngitsumik sunniuteqartarluni. Taamaattumik inuiaqatigiinni naligiinngissutsip akiorniarneqarnissaa Naalakkersuisunit sulissutigineqassaaq, tamatumanilu ilaatigut aqqutissaavoq inuiaqatigiit inuuniarnikkut atugaasa pitsanngorsarneqarnissaannik pingaartitsinissaq.

Inuiaqatigiinni ataatsimut isigalugu naligiinngittoqarnerata akiorneqarnissaanik sulissuteqarnitsinni suiaassutsit akornanni naligiittoqarnissaata qitiutillugu sammineqarnissaa ilanngullugu isiginiartariaqarparput.

Uanga nammineq sulininni suiaassutsit akornanni naligiittoqannginnera maluginiartarpara. Angutit arnanit amerlanerusut Inatsisartunut qineqqusaarnissamut sassartarput. Inatsisartunilu nutaani angutit arnanit amerlanerungaatsiarput.

Arnaqatikka allat oqaloqatigigaangakkit aperalugillu naalakkersuinermik suliaqarnissamik imaluunniit pisortatut atorfeqalernissamik sooq anguniagaqannginnersut arlallit oqaatigisarpaat naalakkersuinermik suliaqarnissamut imaluunniit pisortatut atorfeqalernissamut annertuumik suliassaqarfiullunilu angalanermik nassataqartumut nangaassuteqarnerminni ilaquttaminnut qitornaminnulluunniit akisussaaffeqarnertik uniffigisarlugu.

Arnat siunissami naalakkersuinermik suliaqarnermut, peqatigiiffilerinermut, siulersuisunut ilaasortaanermut pisortani namminersortunilu aqutsinermut allatulluunniit peqataanerulissappata eqqarsariaaserput allanngortittariaqarparput. Assersuutigalugu Norge isumassarsiorfigisinnaavarput, tassani suiaassutsit akornanni naligiissitaanissaq assut pingaartinneqarmat suliniutillu aalajangersimasut arlallit ingerlannerisigut naligiissitaanerup siuarsarnissaa nunap naalakkersuisuinit anguniagaqarfiusumik suliniutigineqarluni.

Naalakkersuisut maannakkorpiaq anguniagaraat angajoqqaat erninerup kingorna sulinngiffeqarnissamut periarfissaasa ineriartortinneqarnissaat, taamaalilluni anaanat ataatallu suliffissaqarniarnerminnut akornutaanngitsumik meerartik sapinngisamik sivisunerpaamik najorsinnaassammassuk.

Aamma suiaassutsit akornanni naligiissitaanissaq eqqartortillugu arnat kisiisa pingaarnerutillugit sammissanngilagut. Ilinniartitaaneq eqqarsaatigalugu arnat angutinit amerlanerusut ilinniagaqalersarput. Tamatumani suiaassutsit akornanni naligiittoqarnerulernissaa aamma sulissutigisariaqarparput.

Sammineqarsinnaasut amerlaqaat suliassallu annertullutik. Nunatsinni naligiinneq naligiissitaanerlu pillugit oqallilluartoqarnissaanik aammalu Nunatsinni Naligiissitaanermut ullorsiorluarnissaannik tamassi kissaappassi.”

Annertunerusumik paasissutissat Naalakkersuisup allattaanut Rosa Thorsen, mobil: +299 55 33 03 imaluunniit e-mail: rosat@nanoq.gl, saaffiginninnikkut pissarsiarineqarsinnaapput.