Uumaasuutit nappaataat pillugit saaffiginnissutaasartut

Nunatsinni Uumasut Nakorsaqarfik Inuussutissalerinermullu Oqartussaaffik (UNIO) angerlarsimaffimmi uumaasuutit nappaataat pillugit inuttaasunit saaffiginnissutinik amerliartuinnartunik tigusaqartalerput.

UNIO innuttaasunut inussiarnersumik erseqqissaatigissavaa UNIO tassaammat oqartussaqarfik Namminersorlutik Oqartussat ataanni inissisimasoq nunatsinni inuussutissat isumannaatsuunissaannik, uumasunut nakorsaqartinnerisigut upalungaarsimanermik uumasullu atugarissaarnissaannik pingaarnertigut akisussaaffeqartoq.

Inatsisit atuuttut naapertorlugit UNIO inuit ataasiakkaat suliffeqarfiilluunniit uumasuutaannik napparsimasunik misissuinissamut katsorsaasarnissamullu piussaaffeqanngilaq.  Taamaattumik innuutaasut uumasuutiminnik napparsimasunik saaffiginnissuteqassatillutik nunatsinni uumasut nakorsaannut namminersortunut saaffiginnittarnissaat UNIO-mit innersuussutigineqarpoq. UNIO-mit erseqqissaatigineqassaaq Nuummi, Qaqortumi Ilulissanilu kisimi namminersortunik uumasunut nakorsaqarmat. 

UNIO uumasunik inuussutissarsiutitut atorneqartartunik tassalu qimminik qimuttunut, savaatillit qimmiutaanut aammalu nunaatillit uumasuutaannut tunngatillugu piginnittunut siunnersuisarnermik suliaqartarpoq.  Tamatuma saniatigut UNIO nunaatillit uumasuutaanik piginnittunut akilerneqarluni passussinermik nakorsaatitigullu killilimmik ikiuinissamik siuliaqartarpoq.

UNIO-p suliarisartagai akisussaaffigisaalu allat pillugit paasissutissat uani atuarneqarsinnaapput
http://naalakkersuisut.gl/kl-GL/Naalakkersuisut/Naalakkersuisoqarfiit/Fiskeri-Fangst-og-Landbrug/Veterinaer-og-Foedevare-Myndigheden-i-Groenland

 Apeqqutissaqartoqartillugu UNIO-mut saaffiginnittoqarsinnaavoq uunga e-mail: uumasut@nanoq.gl imaluunniit oqarasuaat aqqutigalugu: 34 50 00 ammasarfiata iluani, tassa ataasinngorneq, marlunngorneq, sisamanngorneq tallimanngornerlu nal. 9.00-imiik 15.00-ip tungaanut.