Eqqissisimasumik suleqatigiinnissap pingaaruteqassusaa naqissuserpaa

Naalakkersuisup Vivian Motzfeldtip eqqissisimasumik suleqatigiinnissap pingaaruteqassusaa naqissuserpaa

Ilulissani isumaqatigiissut ukiunik qulinngortorsiorneranut atatillugu majip 22-ani 23-anilu nunat issittumiittut nunap inoqqaavisa aallartitaat naapeqatigiipput. Peqataasut Ilimanaq tikeraarpaat, ataavartumillu ineriartortitsinissamut periarfissat namminneq isiminnik takullugit. Taassuma saniatigut tikeraat Isuanukarput, tassanilu sermersuup ingerlaarnera silaannallu allanngoriartornera pillugit oqalugiarfigineqarput.

Ullup tulliani qaffasissumik ataatsimiittoqarpoq, tassani nunat peqataasut tamarmik Ilulissani isumaqatigiissummi pisussaaffiusut uppernarsaqqippaat, taamatullu suleqatigiinnerup pingaaruteqarnera naqissuserlugu.

Aalisarneq pillugu isumaqatigiissut Issittumi nunat aalisarnermik ingerlataqartut 200 sømilip avataani ilisimatuussutsikkut paasissutissanik tunngavissaqalernissap tungaanut aalisarnerup killilersimaarnissaanut imminnut pisussaaffilernerat assersuutissatsialattut takussutissiivoq. Issittumi nunat immamut sineriallit aamma FN-imut immap naqqanut oqartussaaffik annertusinissaanut qinnuteqaatitit pillugit oqaloqatigiipput. Oqaliiserineqartut nunarsuarmioqatigiit akornanni inatsisini aammalu Ilulissanilu isumaqatigiissummi tunngaveqartumik suleqatigiinnermut assersuutaapput.

Eqqissisimasumik suleqatigiinneq taanna pingaaruteqarluinnartuusoq ingerlateqqinneqassasoq Naalakkersuisup Vivian Motzfeldtip naqissuserpaa;

”Uagut eqqissisimasumi najugaqartuusugut eqqissinerup attatiinnarnissaata pingaassusaa puigoqqajaasarparput. Nunarsuarmioqatigiinni eqqissiviilliortoqartillugu aammalu siunissami Issittumi ineriartornissamut periarfissat eqqarsaatigalugit Ilulissani isumaqatigiissut pingaarutilerujussuuvoq. Nuannaarutigisorujussuuara nunat Issittumi Siunnersuisooqatigiini ilaasortaasut, ICC aammalu Samerrådet pisoqarnerani uani eqqissisimasumik suleqatigiinnissaq tapersersorlugu uppernarsarmatigit.” 

Malunnartitsinermi ilisimatusarneq pillugu isumaqatigiissut Issittumi Siunnersuisooqatigiit ataanni isumaqatigiissutigineqartoq aamma oqaluuserineqarpoq. Tassani ilaatigut Minik Rosingip saqqummiuppaa Issittumi sumiiffiit akimorlugit suleqatigiinnerup pingaaruteqassusia. Naggataatigullu Ilulissani isumaqatigiissutip ukiunik qulinngortorsiorneranut atatillugu eqqaassutissamik Ilulissaniitinneqartussamik saqqummiussisoqarpoq.

Annertunerusumik paasissutissanik pisariaqartitsiguit Naalakkersuisoqarfimmi pisortaq Kenneth Høegh attavigisinnaavat, kenh@nanoq.gl, +299 565604